Jo Nesbø

Jo Nesbø (* 29 Maart 1960 in Oslo) is 'n bekroonde Noorse spanningsverhaalskrywer en musikus. Ná sy akademiese opleiding as ekonoom en finansiële analis aan die Noorse Handelshøyskole was hy werksaam as aandelemakelaar en joernalis, terwyl hy gelyktydig ook die sanger en liedjieskrywer van die popgroep Di Derre was.

Jo Nesbø
Jo Nesbø in 2008
Gebore	29 Maart 1960 Oslo, Noorweë
Nasionaliteit	Noorweë
Beroep	Spanningsverhaalskrywer en musikus
Bekend vir	Rødstrupe (2000) Sorgenfri (2002) Marekors (2003) Snømannen (2007)
Webwerf	www.jonesbo.com

Biografie

Jo Nesbø is in Molde grootgemaak. Sy moeder was as bibliotekaresse werksaam en het al vroeg sy belangstelling vir literatuur gewek. Nogtans het hy op skool nie baie goed gedoen nie en was vasberade om 'n loopbaan as professionele sokkerspeler by Tottenham te volg. Op die ouderdom van 17 jaar het by Molde se voetbalklub (Molde Fotbalklubb) gedebuteer, van die skool weggebly en hom liewer op voetbal gekonsentreer. 'n Tyd later is die anterior kruisligamente in sy knieë geskeur, en Nesbø was genoodsaak om sy loopbaan as voetbalspeler te staak.

Nesbø het in Noord-Noorweë drie jaar lank diensplig gedoen en sy vrye tyd gebruik om sy agterstand in sy skoolvakke in te haal. Ná die einde van sy diensplig het hy Norges Handelhøyskole in Bergen ingeskryf. Hier het hy saam met studentemaats die popgroep De Tusen Hjem gestig, wat egter nooit sukses behaal het nie en ontbind is toe Nesbø ná die voltooiing van sy graad na Oslo verhuis het.

In Oslo het Nesbø die finansiële bedryf betree en al sy musikale ambisies laat vaar totdat hy na 'n jong jazz-basspeler geluister het. Op die volgende dag het die twee die groep Di Derre gestig. Een jaar later was hulle al op konserttoer, en twee jaar later het hulle 'n platekontrak gekry. Nesbø was gelyktydig as aandelemakelaar werksaam, maar ná 'n jaar waartydens hy bedags gewerk en saans opgetree het, het hy genoeg had. Hy het 'n halfjaar verlof geneem en na Australië gevlieg. Net kort voor sy vertrek het 'n medewerker van 'n uitgewery hom gevra of hy nie 'n boek sou kon skryf nie. Tydens die dertig uur, wat sy vlug na Australië geneem het, het die plot vir die roman Flaggermusmannen ("Die Vleermuisman") ontvou. 'n Halfjaar later het Nesbø met 'n boekmanuskrip in sy koffer na Oslo teruggevlieg.

Literêre werk

Die manuskrip van Flaggermusmannen is onder 'n pseudoniem aan die Aschehoug-uitgewery gestuur om te verhoed dat Nesbø se bekendheid die literêre waardering sou beïnvloed. Aschehoug het besluit om die boek uit te gee, en in die najaar van 1997 was dit by boekwinkels beskikbaar. Die roman was 'n weghol-sukses en is onder meer as die beste Noorse speurverhaal met die Riverton-prys en as die beste Skandinawiese speurverhaal met die Glasnøkkel bekroon.

Van Nesbø se roman Snømannen ("Die Sneeuman") is in 2007 al in die eerste werk ná verskyning 160 000 eksemplare verkoop. Die boek was sodoende die mees verkoopte Noorse roman ooit.

Nesbø se Rødstrupe is in 2000 met die Noorse Bokhandlerprisen bekroon. Die Engelse vertaling The Redbreast is in 2006 as die beste vertaalde misdaadroman in 'n Engelssprekende land en in 2007 vir die Britse Crime Writers' Association se Duncan Lawrie International Dagger-prys benoem. Nesbø het in 2007 nog eens die Noorse Bokhandlerprisen gewen met sy roman Snømannen.

Jo Nesbø se boeke het meer as 33 miljoen eksemplare wêreldwyd verkoop en is in vyftig tale vertaal.

Diskografie

Soloalbum

• Karusellmusikk – (2001)

Albums met Di Derre

• Den Derre med Di Derre – (1993)
• Jenter & sånn – (1994)
• Gym – (1996)
• Slå meg på! – (1998)
• Di beste med Di Derre – (2006)

Bibliografie

• Flaggermusmannen – speurverhaal (1997)
• Kakerlakkene – speurverhaal (1998)
• Stemmer fra Balkan/Atten dager i mai (saam met Espen Søbye) – dokumentêr (1999)
• Rødstrupe – speurverhaal (2000)
• Karusellmusikk – novelle (2001)
• Sorgenfri – speurverhaal (2002)
• Marekors – speurverhaal (2003)
• Frelseren – speurverhaal (2005)
• Snømannen – speurverhaal (2007)
• Doktor Proktors prompepulver – kinderboek (2007)
• Det hvite hotellet – kortverhaal (2007)
• Hodejegerne – speurverhaal (2008)
• Doktor Proktors tidsbadekar – kinderboek (2008)
• Panserhjerte – speurverhaal (2009)
• Doktor Proktor og verdens undergang. Kanskje – kinderboek (2010)
• Gjenferd – speurverhaal (2011)
• Doktor Proktor og det store gullrøveriet – kinderboek (2012)
• Politi – speurverhaal (2013)
• Sønnen (2014)
• Blod på snø – speurverhaal (2015)
• Mere blod − speurverhaal (2015)
• Kan Doktor Proktor redde jula? − kinderboek (2016)
• Tørst − speurverhaal (2017)

Jo Nesbø se speurverhale handel om inspekteur Harry Hole, met uitsondering van Hodejegerne.

Literêre toekennings

• Riverton-prys 1997, vir Flaggermusmannen
• Glassnøkkel 1998, vir Flaggermusmannen
• Bokhandlerprisen 2000, vir Rødstrupe
• Mads Wiel Nygaards legat 2002
• Beste eietydse Noorse speurverhaal, gekeur in Nitimen 2004, vir Rødstrupe
• Bokhandlerprisen 2007, vir Snømannen
• Den norske leserprisen 2007, vir Snømannen

Verwysings

• Hierdie artikel, of gedeeltes daarvan, is uit die volgende Wikipedia-artikel vertaal: Jo Nesbø

Bronne

• Jo Nesbø se webwerf Geargiveer 7 Januarie 2012 op Wayback Machine op Aschehoug.no
• Her er bokvåre op Dagbladet.no