Johannes van Jerusalem
Johannes Christoffel van Staden is ’n bestuurskonsultant wat sy digbundel publiseer onder die skuilnaam Johannes van Jerusalem.
Lewe en werk
wysigVan Staden matrikuleer in 1987 aan die Hoërskool Pietersburg. Hy studeer verder aan die Universiteit van Pretoria, waar hy ’n B.A.-graad, ’n B.A. Honneurs-graad en in 1992 ’n M.A.-graad in Letterkunde verwerf, laasgenoemde met ’n verhandeling oor “Manlike diskoerse: teorie, mag, politiek, teks-geweld en seks – gerig op die prosa van P.J. Haasbroek en Alexander Strachan”. Hierna is hy van 1992 tot 1995 vertaler in die Staatsdiens en is daarna vanaf 1995 tot 2000 lektor in Kommunikasiekunde aan die Universiteit van Suid-Afrika in Pretoria. Tussen 2002 en 2009 is hy ’n Biodanza-fasiliteerder van die Rolando Toro School of Biodanza. Vanaf September 2004 tot November 2010 gee hy ook saam met Annalie Pauw onder die vaandel van Biodanza Pretoria Body and Soul Fun ’n weeklikse Biodanza klas in Brooklyn in Pretoria. Hy gee steeds op deeltydse basis Biodanza-klasse vir individue en ook op ’n groepsbasis.
Vanaf Januarie 2003 tot Maart 2011 is hy as assosiaat betrokke by KnowHouse CC, waar hy strategiese konsultasiewerk in die menslike hulpbronne veld doen, spesifiek in die ontwerp en ontwikkeling van navorsingsprogramme om kultuurtransformasie, veranderingsbestuur en ander gedragsveranderinge in die werkplek teweeg te bring. Hy is vanaf 2008 besturende direkteur van Move Transformation Modalities CC, wat optree as konsultante in kreatiwiteit en korporatiewe lering. Saam met Henning Pieterse ontwikkel hy die opleidingsprogram Creative Journey waar deelnemers deur middel van beweging, klank en direkte tegnieke geleer word om hulle kreatiwiteit te herwin. In April 2011 is hy medestigter van Oxygen for Conscious Organisation, ’n konsultasiefirma wat die inherente sterkpunte van die kliënte-organisasie op holistiese wyse saamsnoer tot ’n gedugte eenheid. Hierdie firma word in Julie 2012 ontbind. Vanaf Augustus 2012 is hy onder andere as bestuurder van intervensies betrokke by WorldsView Academy for Organisational Change in Johannesburg. Hulle spits hulle daarop toe om leiers, bestuurders en spanne op alle vlakke te help om ’n sterk gedeelde visie en doelwitte te ontwikkel om die organisasie so meer doeltreffend te maak.
Hy tree by verskeie geleenthede by Versindaba op Stellenbosch op waar hy van sy eie gedigte voorlees en neem gereeld deel (soms onder die naam JC Van) aan die Bekgevegte by kunstefeeste en elders, waar toeskouers getrakteer word op impromptu gedigte. In 2012 skryf hy by die Universiteit van Pretoria in vir ’n Ph.D.-graad in Kreatiewe Skryfkuns.
Skryfwerk
wysigHy skryf sy gedigte meestal onder die skuilnaam Johannes van Jerusalem, hoewel sommiges onder die naam Christo van Staden onder andere in Tydskrif vir Letterkunde verskyn. Die titel van sy debuutbundel[1] “Eros ontbind” verwys na Eros, die liefdesgod, wat tot niet gaan. In die meerderheid van die gedigte is Eros egter springlewendig en die herkoms van die titel is te vind in die inleidende gedig, waar die begrafnis van Eros beskryf word.[2] In hierdie gedig word die noue verbintenis tussen dood en lewe en tussen ontbinding en vrugbaarheid as die hooftemas van die bundel ingelui.[3] Volgens die Griekse mitologie beliggaam Eros die erotiese liefde en seksuele begeerte en sorg hy ook vir ’n kosmiese samesyn tussen die hemelse en die aardse.[4] Hy word dus ook beskou as simbool van lewe na die dood. Die bundel bevat baie erotiese fantasieë, aangevul met mitologiese verwysings, waar seks gesien kan word as ’n kortpad na ’n geestelike dimensie. Daar is dan ook gedigte wat om ’n religieuse interpretasie vra, soos twee “psalms”, ’n klaaglied en die eie motto voor in die bundel, gekoppel met die digter se skuilnaam. Hoewel daar vyf afdelings is, word die gedigte genommer en loop die nommering regdeur, sodat dit ’n strak opeenvolging en eenheid suggereer. Van sy gedigte word in die geleentheidsbundels van Versindaba asook in versamelbundels soos “Groot verseboek” opgeneem. Hy skryf ook Engelse gedigte wat onder andere in Scrutiny2 gepubliseer word en twee Engelse gedigte word in “Eros ontbind” geplaas.
Hy publiseer ook kortverhale onder die naam Christo van Staden in Tydskrif vir Letterkunde. Sy kortverhaal “Die duiwel se haan kraai net een keer” word opgeneem in die versamelbundel “Naglopers” onder redaksie van Lindeque de Beer.
Publikasies
wysig| Jaar | Publikasies |
|---|---|
| 2006 | Eros ontbind |
Bronnelys
wysigInternet
wysig- Acre Conference: http://www.acreconference.co.za/ChristovanStaden.aspx Geargiveer 23 Oktober 2016 op Wayback Machine
- Facebook: https://www.facebook.com/christo.vanstaden
- LinkedIn: https://www.linkedin.com/in/christovanstaden Geargiveer 15 Maart 2009 op Wayback Machine
- LitNet: http://www.litnet.co.za/author/johannes-van-jerusalem/
- Versindaba: http://versindaba.co.za/gedigte/johannes-van-jerusalem/ Geargiveer 15 Julie 2017 op Wayback Machine
- Who’s Who SA: http://whoswho.co.za/christo-van-staden-413810 Geargiveer 12 Oktober 2013 op Wayback Machine