John Sowden House
John Sowden House
5121 Franklin Avenue
Los Feliz, Los Angeles, CA
Verenigde State
Opgerig
1926
Argitek
Lloyd Wright
Boustyl
Maya Revival
Los Angeles Historic-Cultural Monument
LHCM #762
Webtuiste
sowdenhouse.com
John Sowden House, ook bekend as Jaws House of Franklin House, is 'n privaat woning in die Los Feliz-buurt van Los Angeles wat in 1926 volgens 'n ontwerp van die argitek Lloyd Wright (1890–1978), die seun van Frank Lloyd Wright, volgens die Mayan Revival-styl ontstaan het. Die huis, wat in opdrag van John en Ruth Sowden gebou is, staan bekend vir sy ryklik versierde tekstielblokke - klein betonblokke waarvan die oppervlak van 'n kunsvolle tekstuur voorsien is - en sy ongewone buitefasade wat, afhangende van die waarnemer se vertrekpunt, óf soos 'n Majatempel óf soos die gapende bek van 'n groot withaai lyk.
Die huis het 'n donker verlede wat met een van sy vroeëre huurders, Dr. George Hodel, en die grusame moord op die jong, vooruitstrewende aktrise Elizabeth Short, bekend as Black Dahlia, in 1947 verbind word. Ondanks die mees uitgebreide soektog in die geskiedenis van Los Angeles kon die psigopatiese moordenaar die polisie ontglip.[1] Hodel, wat in die huis na bewering sy bisaar partyjies gevier het, was een van die verdagtes in die moordsaak wat sentraal staan in die televisiekanaal TNT se minireeks I Am the Night van 2019.
Vroeg in 2018 is John Sowden House, een van die mees ikoniese wonings in die hart van Hollywood, vir $4,7 miljoen deur die entrepreneur Dan Goldfarb en sy eggenote Jenny Landers gekoop. Goldfarb, die tiende eienaar van die huis, het 'n fortuin gemaak met sy onderneming Canna-Pet wat 'n hele reeks beskuite, tinkture en kapsules met 'n dagga-ekstrak, nie-psigoaktiewe cannabidiol (CBD)-olies, vervaardig en bemark waarmee 'n groot verskeidenheid siektes in honde, katte en perde behandel word.[2]
Goldfarb en Landers, wat met hul sewe Persiese katte in John Sowden House ingetrek het, het die huis en sy tekstielblokke sorgvuldig gerestoureer om hier 'n verskeidenheid liefdadigheids- en ander funksies te reël soos. So is hier reeds installasies van kunsgalerye vertoon, ontwerperskerse bekendgestel, albumvrystellingspartjies gehou en 'n multiamedia- en toegevoegde werklikheids-konsert deur die Yslandse popgroep Sigur Rós aangebied.[3] Die huis sal daarnaas 'n dagga-oase wees waar die publiek oor die geneeskundige gebruike van CBD ingelig word.
Verwysings
wysig- ↑ Steve Hodel: Black Dahlia Avenger. New York, NY: Harper Paperbacks 2006
- ↑ Los Angeles Magazine, 26 Januarie 2018: One of L.A.’s Most Famous Homes Was Just Purchased with a Pet Cannabis Fortune. Besoek op 25 Julie 2019
- ↑ kcrw.com, 23 Julie 2019: Design & Architecture - LA’s iconic Sowden House parties on, with new purpose. Besoek op 25 Julie 2019