Kaiserschmarrn
Kaiserschmarrn [ˈkaɪ̯zɐˌʃmaʀn] (ook gespel as: Kaiserschmarren, Hongaars Császármorzsa, Tsjeggies Císařský trhanec) is een van die bekendste Schmarrn-meelkosdisse in die Oostenrykse kookkuns. Die gereg, wat van pannekoekdeeg berei word, is vernoem na keiser Frans Josef I. In Oostenryk word dit meestal met Zwetschkenröster bedien, 'n soet kompot wat van pruime, enkele eetlepels water, suiker, lemoensap, kaneel en naeltjies berei word. In die tyd van die Oostenryks-Hongaarse dubbelmonargie het die dis ook in Hongarye gewild geraak.
Metode wysig
Die pannekoekdeeg vir Kaiserschmarrn word van meelblom, melk, eiers, suiker en sout berei en in 'n kleefvrye pan met botter gebak totdat die onderkant van die pannekoek goudbruin is. Vervolgens word dit met 'n spatel of kooklepel in stukkies gebreek wat verskeie kere versigtig in die pan gedraai word totdat hulle gaar is. Die pannekoekstukkies word met poeiersuiker bestrooi en saam met Zwetschkenröster bedien.
Daar is 'n groot aantal variante van die resep. So word rosyntjies of amandels; neute, kwark (Topfenschmarrn) of suur room by die deeg gevoeg. Die eiers kan geskei word; daarby word die eierwit styf geklop. Die deeg kry sodoende 'n baie sag en lugtige tekstuur. Ook die bylae kan gevarieer word. In plaas van pruime word Kaiserschmarrn ook met kersies, mirabellepruime of appels bedien.
'n Verwante dis is Semmelschmarrn (afgelei van Oostenryks en Beiers Semmel "rolletjie"). Hiervoor word rolletjies in stukkies gebreek of gesny en in melk geweek.
Eksterne skakels wysig
Resepte