Karin Konsentrasiekamp

Karin Roodt (néé Bredenkamp) is die vrou van die Afrikaanse skrywer en taalaktivis Dan Roodt. Sy skryf aanvanklik onder die skuilnaam Karin Konsentrasiekamp.

Lewe en werk

Karin Konsentrasiekamp is die skuilnaam van Karin Bredenkamp. Sy gaan skool aan Oranje Meisies Hoërskool in Bloemfontein en aan Linden Hoërskool in Johannesburg. Sy is getroud met die skrywer en digter Dan Roodt wat sy ontmoet terwyl sy ’n kunsstudent is aan die Universiteit van die Witwatersrand. Saam gee hulle in hulle studentejare die letterkundige tydskrif Taaldoos uit, wat deur die owerhede verbied word. Wanneer hy in 1985 Frankryk toe uitwyk om sy verpligte militêre diensplig te ontduik, gaan sy saam met hom. In Parys gee sy onderwys in Engels aan ’n bekende taalskool, waar sy onderrig gee aan filmsterre, diplomate en sakelui. Die egpaar het twee kinders en bly in Dainfern in Johannesburg. Tydens die nasionale verkiesing in 2014 is sy sewende op die lys van die regse politieke party Front Nasionaal, nadat sy in 2011 tydens die munisipale verkiesings ’n kandidaat vir die Vryheidsfront Plus was. Sy is skilder en werk as redakteur by die webwerf www.praag.co.za Geargiveer 16 Januarie 2016 op Wayback Machine.

Skryfwerk

Verskeie van haar bydraes word opgeneem in die tydskrif Taaldoos en haar gedig “Hoe om ’n hoender te naai” word voorgehou as een van die vernaamste redes waarom die eerste uitgawe verbied is. Die boek Hoekom nies u nie? bevat ’n aantal lukrake gedagtes. Onder haar eie naam (Karin Roodt) skryf sy die spanningsroman Duiwelsasem , wat deur Praag Uitgewery gepubliseer maar ook as e-boek bemark word. Die president van ’n klein Afrikaland in die meregebied, ryk aan olie en uraan, sterf in die openbaar tussen sy lyfwagte aan ’n “hartaanval”. Hierna raak ’n menigte belanghebbendes betrokke. Daar is KERN, ’n voortsetting van SS15, ’n netwerk van internasionale geheime agente; operateurs van die CIA wat baat gevind het by die korrupte president; die Chinese wat ook graag wil oorneem; terwyl die Ierse wapenhandelaar Seamus Boyle ’n geleentheid sien om wapens te verkoop om ’n opstand te stook ná die dood van die president. Die dokter, Frik van der Merwe, het voorheen die fout gemaak om gif te ontdek wat in die liggaam van die president se afgestorwe voorganger gevind is en hy is op die teikenlys van ’n paar mense, maar hy is ook ’n patriotiese Afrikaner wat graag vrede in Afrika wil hê. Kai Brugman is ’n spioen en sluipmoordenaar in diens van KERN wat op sy motorfiets rondjaag om lewens te red en te keer dat Amerika ’n totale greep op Afrika en Suid-Afrika verkry. Waarnemers op die kantlyn is twee Afrikaanse joernaliste van Suid-Afrikaanse koerante. Die verhaal beskryf in watter mate kolonialisme deur Engeland, Amerika en China nog in die hedendaagse Afrika voortleef, maar nou onder die dekmantel van politieke korrektheid bedryf word. Afrikaners word maklik as sondebokke vir die groot moondhede se wandade gebruik, terwyl korrupte en magsbehepte Afrika-leiers mekaar en hul eie mense om elke hoek en draai op elke denkbare manier ondergrawe. Karin vertaal ook verskeie werke vanuit Nederlands en Frans in Afrikaans en Engels.

Publikasies

• 1985 Hoekom nies u nie? (Karin Konsentrasiekamp)
• 2012 Duiwelsasem (Karin Roodt)

Sien ook

• Karin Roodt

Verwysings

Boeke

• Kannemeyer, J.C. “Die Afrikaanse literatuur 1652-2004” Human & Rousseau Kaapstad en Pretoria Eerste uitgawe 2005
• Van Coller, H.P. (red.) “Perspektief en Profiel Deel I” J.L. van Schaik-Uitgewers Pretoria Eerste uitgawe 1998