King Cenric

King Cenric was 'n Noorse klipper wat in 1903 by Mosselbaai vergaan het.

Skip

Hierdie houtdriemaster van 1 519 ton is in 1874 in St. John's, Newfoundland en Labrador gebou deur die firma J.K. Dunlop & Kie vir Vaughan Bros. van Liverpool en het die afmetings van 63,59 x 11,99 x 7,32 gehad. Die skip het verskeie kere van eienaar verwissel en die meeste groot wêreldseë bevaar.

Ramp

Teen die einde van 1903 was die King Cenric onder bevel van kapt. A. Paulsen vanaf Frederikstad in Noorweë met ‘n vrag hout afkomstig uit die lande rondom die Oossee onderweg na Mosselbaai. Op 14 November 1903 loop die skip by Diasstrand in ‘n suidoosterstorm op die rotse ten spyte van sy twee ankers wat dit moes verhoed. Kapt. Paulsen, sy vrou en sy dogter sowel as die hele bemanning word gered deur middel van 'n broekboei.

Wrak

Die wrak lê by 34° 9′ 30″ suid en 22° 6′ 48″ oos. Oorblyfsels is soms by ‘n besondere lae gety nog in die branders sigbaar. Dit lê enkele meters van die wrak van die Rosebud wat in 1888 daar vergaan het. Daarna is die wrak aan N. Anderson van Oudtshoorn verkoop. Die boegbeeld toon die koning in sy volle gevegsuitrusting met ‘n swaard in sy hand. Nadat die beeld per ossewa na Oudtshoorn vervoer is, het dit jare lank in die eienaar se tuin gepryk. Nou staan dit in die C.P. Nel-museum.

Bibliografie

• Green, Lawrence G.: Table Bay. In: When the journey’s over. An incorrigible old wanderer’s memories of travel in the Cape and far beyond the Cape; life in cities and solitudes; rare, strange and curious experiences. Kaapstad: Howard Timmins, 1972. ISBN 0-86978-030-1
• Turner, Malcolm: Shipwrecks and salvage in South Africa – 1505 to the present. Kaapstad: Struik, 1988. ISBN 0-86977-387-9