Kloofnek

Kloofnek is ‘n lae rug wat die westelike punt van Tafelberg met Leeukop verbind. Dit bereik ‘n hoogte van nagenoeg 240 m bo seespieël.

Buitengracht en Nuwe Kerkstraat in die stadskom van Kaapstad loop suidweswaarts, loop ineen en van daar af staan die M62-pad vir ongeveer 2 km verby die Tuine en Higgovale bekend as Kloofnekweg. In die nek loop Kloofweg weswaarts uit Kloofnekweg verby Round House (die eertydse jaglosie van lord Charles Somerset en latere goewerneurs van die Kaapkolonie) na Clifton, Bantrybaai, Fresnaye en Seepunt. Suidweswaarts gaan Kloofnekweg verder as Kampsbaaiweg verby Kampsbaai na Bakoven.

Die nek het voorheen bekend gestaan as Vlaggemanshoogte omdat die personeel van die seinpos op Seinheuwel daar gewoon het. Alhoewel die roete al sedert die laat 17de eeu gebruik is, dateer die huidige pas uit 1848.

Bibliografie

• Standard Encyclopaedia of Southern Africa, deel 6. Kaapstad: Nasou, 1972. ISBN 0-625-00322-5