Koraalskildneuskobra

Die koraalskildneuskobra (Aspidelaps lubricus) is 'n slang wat in Suider-Afrika voorkom. In Engels staan die slang bekend as die Cape coral snake. Daar is twee subspesies, naamlik die koraalskildneuskobra (A. lubricus lubricus) en die Kuneneskildneuskobra (A. lubricus cowlesi).

Koraalskildneuskobra
Wetenskaplike klassifikasie
Koninkryk:	Animalia
Filum:	Chordata
Subfilum:	Vertebrata
Klas:	Reptilia
Orde:	Squamata
Suborde:	Serpentes
Familie:	Elapidae
Genus:	Aspidelaps (Laurenti, 1768)
verspreiding van A. lubricus     verspreiding van A. scutatus

Die slang kom weswaarts vanaf Somerset-Oos en Port Elizabeth tot by Kaapstad en noordwaarts tot in die suide van Namibië voor. Dit kom ook in die noorde van die Oos-Kaap en die suidweste van die Vrystaat voor.

Identifikasie

Die slang se rugkant is oranjegeel tot koraalrooi met 20 tot 47 smal swart of donkerbruin dwarsbande wat soms die lyf en stert omkring. Die pens is geelwit met swart dwarsbande.

Die slang verkies klipbanke en klipperige droë, sanderige streke in dorre savanne, Karoostruikveld, fynbos en woestyn. Hulle vreet akkedisse, pootlose akkedisse wat meestal ondergronds leef asook klein slange en knaagdiere.

Gif

Die gif is neurotoksies wat die asemhaling kan aantas. Byte is pynlik en veroorsaak 'n mate van swelsel. Daar is nie 'n teengif vir die slang se byt nie.

Sien ook

• Alfabetiese lys van slange

Bron

• Marais, Johan: Slange & slangbyt in Suider-Afrika. Struik Nature. 2014. ISBN 978 1 77584 024 4