La Défense
La Défense (Frans: [la de.fɑ̃s]; letterlik: "die verdediging") is die sentrale besigheidsdistrik van die Franse hoofstad Parys. Die hipermoderne sakesentrum met sy wolkekrabbers, groot woonstelblokke en inkoopsentra – die grootste van sy soort in Europa – het ná die Tweede Wêreldoorlog ontstaan om in die groeiende vraag na kantoorruimtes te voorsien. Om die historiese stadsbeeld van Parys te bewaar, is die sakesentrum buite die stadsgrense in die westelike voorstede (banlieues) Courbevoie, Nanterre en Puteaux, in die département Hauts-de-Seine – nadat eerste voorstelle in hierdie verband reeds gedurende die 1930's gemaak is – teen die middel van die 1950's beplan en vervolgens verwesenlik.[1]
Geskiedenis
wysigDie naam La Défense is afgelei van die standbeeld La Défense de Paris ("die verdediging van Parys") wat in 1883 ter ere van die Franse soldate, wat in die Frans-Duitse Oorlog (1870–1871) geveg het, opgerig.
Die stadsbeplanning vir die nuwe buurt begin in die vyftigerjare van die 20ste eeu, en aanvanklik word die hoogte van nuwe geboue tot 100 m beperk. Hoewel die ontwikkeling tydens die ekonomiese krisis van 1973 en later nog eens aan die begin van die negentigerjare tot 'n tydelike stilstand kom, groei La Défense steeds verder. Dit is nou die grootste Europese sakesentrum met sowat 30 000 inwoners en 150 000 mense wat in sy kantore werk. Danksy die ekonomiese betekenis van die buurt het dit die bynaam "Wall-Street-sur-Seine" gekry.
Die stadswyk is 'n reusagtige wandellaan, terwyl die parkeerplekke, stasies, buslane en ander geriewe ondergronds aangelê is.
Die futuristiese karakter van hierdie wolkekrabberbuurt word deur die reusagtige Grande Arche, 'n moderne weergawe van die Arc de Triomphe (Triomfboog), beklemtoon. Wit Carrara-marmer verleen 'n pragtige voorkoms aan die kubus wat sowat 100 m hoog is en in sy midde plek genoeg bied om die Notre-Dame-katedraal op te neem. President François Mitterrand het die oprigting van die Grande Arche as 'n simbool vir die uitdagings van die moderne tyd aangemoedig. Die kubus is deur die Deense argitek J.O. von Spreckelsen ontwerp en in 1989 ter herinnering aan die Franse Rewolusie ingewy.
Die utopiese karakter van die argitektuur word versag deur 'n aantal kunsobjekte soos die Stabile van Calder en die fantasieryke figure van Miró.
Verwysings
wysig- ↑ (en) Andrew Ayers: The Architecture of Paris. An Architectural Guide. Stuttgart/London: Edition Axel Menges 2004, bl. 308
Eksterne skakels
wysig| Wikimedia Commons bevat media in verband met La Défense. |
- Nuus
- (fr) Paris La Défense
- Argitektuur
- Stadsbeplanning