Laerskool Newton Park
Die Laerskool Newton Park is ’n Afrikaansmedium- primêre skool in Port Elizabeth.
Die skool is oorspronklik op 25 Januarie 1926 met 18 leerlinge in ’n huis op die hoek van Eerste Laan en Mowbraystraat, Newton Park, gestig. Die eerste onderwysers, wat ook as skoolhoof opgetree het, was ene mej. Damerell. Later het die skool verskuif na die St. Hughes-kerksaal, Dit was destyds ’n Engelsmediumskool en het as die Newton Primary School bekendgestaan. In Januarie 1930 is die eerste gebou op die huidige perseel betrek. Die hoeksteen van dié gebou pryk vandag in die huidige skoolgebou se voorportaal.
In 1932 het die Newtonskool parallelmedium geword en begin 1954 Afrikaansmedium. Die Engelse leerlinge het toe oorgeskuif na die pasvoltooide Laerskool Herbert Hurd. In 1970 is die Afrikaansmediumskool herdoop tot die Laerskool Hendrik Verwoerd en ’n jaar later is die huidige skoolgebou betrek. Weens die konnotasies van die skool se naam het die ouers in Oktober 1994 ’n referendum versoek waarin oor ’n ander naam besluit kon word. Die uitslag daarvan was dat die naam met ingang 1 Januarie 1995 weer die Laerskool Newton Park geword het.
Die skool se leuse is "Dink en doen".
Skoolhoofde wysig
- Mej. Damerell 1926 - 1931
- Mnr. D. Cranna 1931 - 1949
- Mnr. S.J.M. van Heerden 1949 - 1966
- Mnr. C. Knoetze 1967 - 1970
- Dr. J.H. Botha 1971 - 1973
- Mnr. D. Knoetze 1973 - 1993
- Mnr. C.G. Viljoen 1993 - 2012
- Mnr. J.J. Pienaar 2013 - hede