Leliefontein

Leliefontein is 'n klein sendingstasie-dorpie wat ongeveer 29 km vanaf Kamieskroon in die Kamiesberge geleë is.

Leliefontein
Metodiste Sendingkerk, Leliefontein
Leliefontein  Leliefontein se ligging in Noord-Kaap
Koördinate: 30°18′0″S 18°5′0″O
Land	Suid-Afrika
Provinsie	Noord-Kaap
Distrik	Namakwa
Munisipaliteit	Kamiesberg
Oppervlak
• Totaal	0,67 km2 (0,26 vk. myl)
Bevolking  (2011)
• Totaal	616
• Digtheid	919/km2 (2 380/vk. myl)
Rasverdeling (2011)
• Indiërs/Asiërs	0.3%
• Bruin mense	99.2%
• Swart mense	0.3%
• Ander	0.2%
Taal (2011)
• Afrikaans	95.8%
• Engels	2.8%
• Tswana	1.1%
• Ander	0.3%

Die dorpie het blykbaar sy naam gekry van die wit lelies, met botaniese naam Colchicum capense maar algemeen bekend as die "Bobbejaanskoen" of "Patrysblom", wat in die maande Augustus tot Oktober deel is van die Namakwalandse blommeprag.

Geskiedenis

Die dorpie het in 1816 ontstaan toe eerwaarde Barnabas Shaw die eerste Wesleyaanse sendingstasie geopen het na hy en 'n hoofman van die Namakwastam mekaar in die middel van nêrens ontmoet het. In 1854 het die goewerneur sir George Cathcart die grond om die kerk aan die Namakwastam geskenk in 'n ewigdurende erfpag.

Tweede Vryheidsoorlog

In Januarie 1902 het die dorpie deel gehad aan die Tweede Vryheidsoorlog toe kommandant Manie Maritz die dorp besoek het om 'n proklamasie te bedien op die destydse kleurlinginwoners, omdat hulle beskuldig is van sameswering met die Engelse soldate teen die Boerekrygers. Die leier van die Basters, soos wat Maritz na die inwoners verwys het, het na bewering vir Maritz met 'n kierie geslaan en dit het tot 'n geveg gelei waartydens van die inwoners gedood is.

Die Boerekrygers onder Maritz se bevel het die volgende dag, 28 Januarie 1902, teruggekeer en in die daaropvolgende geveg is nog ongeveer 28 van die inwoners doodgeskiet. Die name van 36 gesneuweldes verskyn op 'n plaket wat aangebring is in die Metodistekerk op die dorpie. Die kerkgebou is ook as 'n nasionale gedenkwaardigheid verklaar.

Sien ook

• Lys van dorpe in Suid-Afrika