Livingstone-Stanley-gedenkteken
Die Livingstone–Stanley-gedenkteken by Moegere in Burundi is 12 km suid van die hoofstad Bujumbura geleë, en kyk uit oor die Tanganjikameer. Dit merk die ligging van 'n besoek deur die ontdekkingsreisiger en sendeling Dr. David Livingstone en die joernalis en ontdekkingsreisiger Henry Morton Stanley, wat twee nagte naamlik dié van 25 to 27 November 1871 hier deurgebring het. In Frans word na die klip verwys as La Pierre de Livingstone et Stanley. Sekere Burundiane beweer hierdie ligging is die plek waar die beroemde eerste ontmoeting tussen Livingstone en Stanley plaasgevind het, waarby laasgenoemde die bekende woorde geuiter het: "Dr. Livingstone, neem ek aan?"
Daardie ontmoeting het egter plaasgevind in Oedjidji in Tanzanië op 10 November 1871 soos duidelik uitgewys word in Stanley se boek, "How I Found Livingstone".[1] David Livingstone se joernaal bevestig ook Oedjidji as die ligging, met 'n inskrywing die dag voor die ontmoeting, wat lees "Vertrek met dagbreek en gaan na Oedjidji", 'n dorp wat aan hom welbekend was. Livingstone gee dan besonderhede van ontmoetings met verskeie Arabierinwoners van Oedjijdi, insluitend van een wat veronderstel was om sy goedere van 'n vorige besoek te berg, voordat hy Stanley se besoek ophaal.[2]
Uit hulle geskrifte wil dit blyk dat die besoek aan Moegere die een van 25 tot 27 November is, wat naamlik deur Livingstone en Stanley beskryf word as een van die mees gasvrye besoeke wat hulle kon geniet. Die uitgekerfde datum, 25 November 1871, is op die rots waarneembaar. In Oedjidji het hulle vir ses dae gerus, en toe per kano vertrek langs die noordoostelike meeroewer, op soek na riviere wat moontlik uit die Tanganjikameer kon vloei. By die Moegererivier het hulle die stat van hoofman Moekamba teëgekom, wat hulle verwelkom het en hulle 'n hut aangebied het om in te rus. Hulle het twee nagte oorgebly, en Stanley teken aan dat Livingstone se bediende Soesi danksy die hoofman se gasvryheid baie dronk geword het.[1] As eerste Europeërs om die area te besoek, was hulle aankoms heuglik en sou die gebeurtenis by 'n sekere latere geleëntheid deur sommige verwar word met die eerste ontmoeting tussen Livingstone en Stanley. Op 'n aantal webblaaie is sodanige foutiewe aanduiding wel aanwesig.
Sien ook wysig
Verwysings wysig
- ↑ 1,0 1,1 Henry M. Stanley: How I Found Livingstone op die Projek Gutenberg webblad, besoek op 13 April 2007.
- ↑ David Livingstone & Horace Waller (red.): The Last Journals of David Livingstone in Central Africa from 1865 to his Death. In twee bande. John Murray, Londen, 1874. (Let daarop dat ná verskeie jare sonder kontak met Europeërs, Livingstone se dagboek met 18 dae van die Europese kalender verskil het, weens die etlike dae wat hy in koorsbeswymings verkeer het, en aangesien sy bediendes nie 'n kalender bygehou het nie. Totdat hy deur Stanley gekorrigeer is, was hy van mening dat die datum van die ontmoeting 24 Oktober was.)
Eksterne skakels wysig
Wikimedia Commons het meer media in die kategorie Livingstone-Stanley-gedenkteken.
