Louis Tregardt-gedenktuin
Die Louis Tregardt-gedenktuin is in Avenida Josina Machel (Josina Machel-laan) in die middestad van Maputo in Mosambiek.
.jpg)
Twintig lede van die trekgeselskap gelei deur Louis Tregardt, onder andere Tregardt self en sy vrou, is in 1838 in Lourenço Marques (tans Maputo) oorlede. Die 28 oorlewendes is in Julie 1839 na Port Natal gerepatrieer. In 1895 is Carolus Trichardt per trein na Lourenco Marques om die grafte van sy ouers en die ander Voortrekkers aan sy kinders en kleinkinders te wys.
In 1953 het dr. Willem Punt die Genootskap Louis Trichardt gestig en begin geld insamel vir 'n gedenktuin. Die monument is 'n ontwerp deur Johan de Ridder en bestaan uit 'n indrukwekkende fries, 'n mosaïekroetekaart, afbeeldings van hoofmanne en San met pyl en boog en 'n ronde vywer. Op 12 Oktober 1968 is dit deur minister Jan de Klerk (vader van F.W. de Klerk) geopen en 25 jaar later op 20 Oktober 1993 het min. Pik Botha 'n kranslegging hier waargeneem. Dit is merkwaardig dat die monument die Mosambiekse burgeroorlog deurstaan het. Pres. Samora Machel het na Frelimo aan die bewind gekom het, die opdrag gegee dat die monument bewaar moet bly. Hierdie gedenkwaardigheid word sedert 1 Desember 2008 deur die Erfenisstigting vir die Genootskap Louis Trichardt bestuur. Die Stigting en die Genootskap is nie die eienaars van die grond nie en die voortbestaan van die monument hang af van die plaaslike owerheid se behoefte aan grond in die middestad vir ander doeleindes.
Kyk ook
wysigBron
wysig- www.erfenisstigting.co.za