Man...of die Monster? (fantasieroman)

Man...of die Monster?
Skrywer	Petronel
Omslagontwerper	Sagteband
Taal	Afrikaans
Uitgewer	Thompson Boekdrukkery
Uitgegee	Augustus 2013
ISBN	978-986-89335-2-1
Letterkunde-portaal

Man...of die Monster? Is ’n fantasieroman gemik op die meer volwasse leser. Die boek is geskryf deur Petronel en in 2013 deur Thompson Boekdrukkery gepubliseer.

In Man...of die Monster speel Petronel met die moontlikheid dat die twee ‘monsters van mitologie’ (weerwolf en vampier) op ’n xenogamiese wyse in ’n menslike wêreld saamgekoppel kan word – Estéban en Carlos Menderiaga – met natuurlik die mens self – Inés Aglionby – wat reg in die middel van die intrige vasgevang word.

Dit is dan ook waar haar self-opgemaakte woord Latstrivarco om die Menderiaga tweeling se spesie te beskryf vandaan kom. Latstrivarco is ’n samevoeging van drie verskillende woorde. Lat - Canis Latrans - Prêriewolf stri - Strigoni - ’n Italiaanse vampier aan die kant van goedheid; en ook ’n dodelike vyand van alle euwel vampiere. varco - Varcolaci - ’n Romeinse woord vir ’n baie magtige vampier wat ’n bleek menslike voorkoms het; en ook in sommige kulture ’n woord wat gebruik word om ’n weerwolf te beskryf.

Titelbeskrywing

Die titel Man...of die Monster het in werklikheid ’n dubbel betekenis.

Eerstens verwys dit na die fisiese transformasie van Estéban Menderiaga die mens na Estéban die monster en hoe Inés Aglionby, ’n ongekunstelde joernalis in ’n vreemde land, eers op die man verlief raak en later die monster ook aanvaar.

Tweedens verwys die titel na daardie donker kant in ’n ieder en elk van ons se persoonlikheid wat bly kop uitsteek. In Estéban se geval is dit die wreedaardige bloeddors wat telkens dreig om deur die menslike fasade wat hy selfs in sy vervormde toestand probeer hou te breek. In die geval van Inés is dit die geheime hunkering na die morele risiko wat Estéban die adonis vir haar inhou so wel as die waarskynlike donker gevaar wat sy van die begin af in die afwisselende buie van sy persoonlikheid opmerk.

Milieu

Andorra word beskryf as ’n landstreek van diep klowe, bekrompe valleie en toringhoë bergpieke hoog in die oostelike Pireneë tussen Frankryk in die noorde en Spanje in die suide. Meestal ’n toeriste-aantreklikheid met heelwat ski-oorde in die omgewing produseer Andorra ook klein hoeveelheid yster, lood en marmer. Met sy alpynse ligging, koel somers, swaar sneeuval en toevallig ook ’n paar verafgeleë marmer breekgate tussen die klowe en valleie versteek skep Andorra die perfekte milieu vir ’n vampier/weerwolf verhaal vol geheimsinnige intriges.

’n Interessante stukkie geskiedenis omtrent Andorra is dat Frankryk se Graaf Feix en Spanje se Biskop van Urgel eeue gelede in ’n ewige stryd gewikkel was oor wie verantwoordelik is vir die regering van Andorra. Hierdie dispuut is in 1279 opgelos toe beide die leiers gesamentlike opperhere gemaak word. Vir 700 jaar word Andorra gesamentlik regeer deur die ‘Prinse van Andorra’ - die leier van Frankryk en die Romeinse Katolieke Biskop van Urgel in noordwes Spanje. In hierdie tydperk betaal Andorra alternatiewelik aan Frankryk en Spanje ’n jaarlikse eerbetoon wat ’n ‘questia’ genoem word. Hoewel meestal seremonieel, is beide die President van Frankryk en die Biskop van Urgel vandag nog gesamentlike regeringshoofde van Andorra.

Storielyn

Inleiding

In Suid-Afrika is marmer die nuwe ‘moet’. Argitekte, huiseienaars, selfs begrafnisondernemers gebruik dit deesdae in al wat pilaar, toonbank-blad en kopsteen is. Vir Nicolas Aglionby, eienaar van die tydskrif ‘Ravissant’, is dit net die regte tyd om ’n artikel daaroor te plaas. Met beide sy seun Louis en die enigste ander joernalis Phillipe met ander projekte besig bly daar net een persoon oor wat die artikel kan gaan doen. Inés. Buitelug-artikels is nou nie iets wat Inés oor die algemeen aandurf nie maar as guns vir haar vader stem sy teësinnig in om na Andorra te reis. Veral ná Nicolas se omkoop van ’n ski-vakansie tussen die sneeubedekte Pireneëgebergtes. Die eerste wat Inés in die pragtige dorpie van Andorra aantref is die onbeskofte buffel in sy swart monsterbakkie wat haar amper van die pad af ry.

Ontvouing

By die breekgat aangekom sal Inés uitvind dat die onbeskofte buffel in sy swart monsterbakkie en Estéban Menderiaga, die breekgat eienaar wat sy veronderstel was om te gaan sien, een en dieselfde mens is. Natuurlik spat die vonke witwarm en teen haar sin voel Inés aangetrokke tot die onbeskofte vent met sy homo erectus grotmaniere. Gebeurtenisse by die breekgat, sowel as die werkers se vorige-eeu onderdanigheid wat so paradoks met ’n hedendaagse samelewing is laat Inés behoorlik kriewel van nuuskierigheid. Iets is nie pluis nie. Die situasie skreeu intrige en smeek behoorlik die joernalis in haar bloed om die geheimsinnige gedrag van die werkers sowel as hul egosentriese werknemer op te los.

Intrige

Nadat iemand in haar chalet inbreek en die foto’s wat sy van die breekgat werkers geneem het steel, besluit Inés om op haar eie ondersoek te gaan instel. Donkernag en ’n baie verlate breekgat dompel haar reg in die middel van ’n baie gruwelike nagmerrie. Bloeddorstige half verkrompelde mens-monsters wat net in die Grimm-broers se sprokies behoort te bestaan keer haar binne die breekgat gronde vas en selfs vir ’n ongekunstelde Inés is dit duidelik dat hulle net een doel voor oë het. Haar bloed.

Al die monsters is egter nie honger nie. Een red haar en versteek haar in ’n grot. In die proses veroorsaak hy ’n bloedbad wat amper die hele gruwelike euwel-spul uitwis. Amper, want nog ’n wrede monster maak sy verskyning. Carlos.

Samevloeiing

Carlos en sy konneksie met Estéban is die geheim wat Estéban met alle mag van Inés af wou weghou. Die reuk van Inés hou egter ’n nuwe moontlikheid vir Carlos met sy eeu-oue vendetta in. Hy weet presies wat hy moet doen om Estéban terug te betaal vir wat hy aan hom en sy familie gedoen het. Sal Estéban vir Inés uit die wrede kloue van Carlos die monster kan red?

Hoofkarakters

Inés Aglionby

In Johannesburg, Suid-Afrika, lei die vier en twintig jarige Inés Esmeralda Aglionby ’n beskutte en baie gerieflike lewe as die enigste dogter van die formidabele Nicolas Aglionby. Met haar moeder wat met haar geboorte oorlede is, het Inés vroeg in haar lewe al geleer om onafhanklik te wees en haar voete vierkantig op die aarde neer te plak, veral as sy haar sê wou inkry in ’n huis waar sy die enigste vrou en dus die swakker geslag is. Alhoewel tot in die afgrond bedorwe is Inés ’n verstandige meisie met integriteit. Sy het egter een swakheid. Sy kan die buitelewe nie verdra nie. Geen kamp opslaan, slaapsakke ooprol of vuurtjies aansteek nie, wat haar natuurlik in die kringe waarin die Aglionby’s beweeg, al ’n hele paar vriendskappe gekos het. Na haar skoolloopbaan studeer Inés joernalistiek en terwyl sy op universiteit is, gaan sy deur ’n hippierige ‘verban die wreedheid van die wêreld’ rebellie tydperk wat haar vader menige grys hare besorg. Nadat Inés haar graad in joernalistiek ontvang spring sy dadelik saam met Nicolas en haar broer Louis in om die familie tydskrif ‘Ravissant’ op die been te bring.

Estéban Menderiaga

Don Estéban François Menderiaga die tweede word groot in die kusdorpie Tarragona in Spanje. As erfgenaam van die Menderiaga skatte lê sy toekoms blink voor hom uitgestrek, totdat ’n diep familie geheim en ’n tragiese ongeluk hom sy erfporsie laat opsê en na Andorra vlug. In Andorra koop Estéban ’n afgeleë marmer breekgat. In die loop van die jare wat volg op sy selfopgelegde verbanning sluit ander van sy soort by hom aan en weggesteek tussen die klowe en ravyne van die Pirenees gebergtes lei die groepie ’n eenkant en afgesonderde lewe. Estéban is nie vriendelik nie. Hy het nie rede om te wees nie en in elk geval, dít wat hy is, moet sover van die menslike populasie af weggehou word as wat moontlik is. Tot nou toe het Estéban se afgesonderde lewe goed gewerk, totdat die klein heks met die spittende tong en vuurspuwende oë by sy breekgat opdaag. Die vader alleen weet wat hom besiel het om die tydskrif mense in Suid-Afrika toestemming te gee om in sy lewe te kom rondkrap. En om die kersie op die koek te sit besluit sy gruwelike verlede ook dat dit nou die tyd is om hom in te haal. Waar gaan dit eindig?

Ander karakters

Carlos Menderiaga

’n Gulsige, bloeddorstige geraamte uit Estéban se donker verlede. Carlos het ’n eeue-oue vendetta teen Estéban en nou is die tyd om hom te begin terugbetaal.

Nicolas Aglionby

Nicolas Aglionby is die vader van beide Louis en Inés. Sy vrou is met Inés se geboorte oorlede en man alleen het hy sy twee kinders opgevoed tot die selfstandige gerespekteerde jongmense wat hulle vandag is. Inés, sy jongste en ook sy enigste dogter het hom vir ’n tydjie lank ’n hele paar slaaplose nagte laat deurbring. Hy het egter alle vertroue in haar vermoë om haar paadjie in hierdie lewe self oop te skop as dit moet want hy is immers die een wat haar op so ’n manier grootgemaak het dat sy eendag vir haarself kan sorg.

Louis Aglionby

Die dertig jarige Louis is ’n hele paar jaar ouer as Inés, sy enigste suster. As enigste ander rolmodel in Inés se lewe, behalwe hulle vader, het hy nog altyd vierkantig agter die snip gestaan en haar beskerm waar hy kon. Twee jaar gelede ontmoet Louis vir Pauline, hulle trou dieselfde jaar en verwag op die oomblik hul eersteling.

François en Gabriela Menderiaga

Estéban se ouers. So verlief dat hulle die wette van die natuur en hul onderskeie spesies ongehoorsaam het om by mekaar te wees. ’n Tragiese ongeluk knip egter Gabriela se lewe ontydig kort en los François alleen met sy seuns en ’n oneindige uitsiglose toekoms agter.

Breekgat werkers en Carlos se ‘bende’

Die breekgat werkers sowel as Carlos se ‘bende’ is weerwolwe. Dit is waarom die beskrywings van Estéban en Carlos wat meer mens as monster daar uitsien, verskil van hul onderskeie volgelinge wat in hulle vervormde toestand net weerwolf is.

Publikasie en ontvangs

Eerste druk: Augustus 2013 deur Thompson Boekdrukkery

Aangewys as Afrifiksie se boek van die maand November 2013 https://www.afrifiksie.com