Mara Takla Haimanot

(Aangestuur vanaf Mara Takla Haymanot)

Mara Takla Haimanot was keiser van Ethiopië en die stigter van die land se Zagwe-dinastie.[1] Sommige koningslyste noem hom bloot Mararah en volgens ander was hy Takla Haimanot.[2]

Mara Takla Haimanot
Dinastie Zagwe-dinastie
Bewind 12de eeu (omstrede)
Voorganger Geen
Opvolger Tatadim

Omstredenheid wysig

Volgens een tradisie is Mara gebore in die provinsie Lasta, wat sy magsbasis was. Hy was oorspronklik ’n generaal van Dil Na'od, met wie se dogter Masoba Warq hy getrou het. Mara het eindelik sy skoonpa se bewind omvergewerp en die nuwe dinastie gestig.[3] Volgens ’n ander tradisie is Dil Na'od deur Goedit omvergewerp en was Mara Takla Haimanot ’n neef van Goedit wat haar ná ’n paar ander lede van haar familie opgevolg het.[4]

Daar is effens twyfel oor wanneer hy aan die bewind gekom het. Daar is twee tradisies oor hoe lank die Zagwe-dinastie regeer het; die algemeenste tradisie was dat hulle 333 jaar lank regeer het en volgens die ander tradisie is dit 133 jaar. Die Italiaanse geleerde Carlo Conti Rossini het die korter tydperk aanvaar en teruggewerk van die aanvaarde datum vir die einde van die Zagwe-dinastie, naamlik 1270. Hy beweer dus die dinastie het omstreeks 1137 ontstaan. Hy glo ’n brief wat die patriarg van Alexandrië, Johannes V, kort voor 1150 van ’n ongenoemde Ethiopiese monarg ontvang het waarin die patriarg om ’n nuwe biskop (abuna) gevra word omdat die destydse biskop te oud was, was van Mara Takla Haimanot wat wou gehad het die biskop moet vervang word omdat hy nie die nuwe dinastie wou bekragtig nie.[5]

Sy koninkryk was veel kleiner as toe die latere Salomoniese Dinastie regeer het, en het dele van die Ethiopiese provinsies Lasta, Wag, Tigray en dalk Noord-Begemder ingesluit.

Verwysings wysig

  1. "Empires of the Forgotten Continent: 8 Fascinating Medieval African Kingdoms". HistoryCollection.co (in Engels (VSA)). 31 Maart 2017. Besoek op 6 April 2020.
  2. Sien G.W.B. Huntingford, "'The Wealth of Kings' and the End of the Zāguē Dynasty", Bulletin of the School of Oriental and African Studies, 28 (1965), pp. 1–23
  3. Taddesse Tamrat. "The Legacy of Aksum and Adafa" in Church and State in Ethiopia. Oxford: Clarendon Press, 1972, pp. 53–64.
  4. Bruce, Travels to Discover the Source of the Nile (1805-uitgawe), vol. 2 pp. 451–453
  5. Taddesse Tamrat, Church and State in Ethiopia (Oxford: Clarendon Press, 1972), ble. 56ff

Skakels wysig