Margaret Keay

(1911-1998), was 'n Suid-Afrikaansgebore Britse plantpatoloog

Margaret Agnes Keay DBE (11 Junie 1911 - 26 Oktober 1998), was 'n Suid-Afrikaans gebore Britse plantpatoloog. Sy het 'n rol gespeel in die ontwikkeling van opvoedkundige instellings in Afrika en deur middel van aktivisme en finansiële programme gefokus op die opleiding van meisies en vroue in Afrika.

Margaret Agnes Keay
Gebore(1911-06-11)11 Junie 1911
Sterf26 Oktober 1998 (op 87)
Cambridge, Engeland
Alma materUniversiteit van Kaapstad
Newnham College, Cambridge

Lewe en loopbaanWysig

Keay is op 11 Junie 1911 in Pretoria gebore, die enigste kind van Skotse ouers. Haar pa was onder-sekretaris vir geregtigheid in die Unie van Suid-Afrika. Haar vroeë skoolopleiding was aan die Kollegiale Meisieskool in Port Elizabeth. Sy het 'n BSc in Plantkunde en 'n Sekondêre onderwysersertifikaat (met lof) aan die Universiteit van Kaapstad behaal.[1]

 
'n Vlasplant

In 1934 het sy 'n navorsingsstudent geword in mikologie en plantpatologie aan Newnham Kollege, Cambridge onder F.T. Brooks. In 1943 is sy aangestel as 'n dosent aan die Universiteit van Reading, Engeland. Sy het ook tyd in Norfolk, Engeland deurgebring waartydens sy ondersoek gedoen het na siektes in vlas, wat vir valskermharnase gebruik is. Na die Tweede Wêreldoorlog het sy teruggekeer na die Cambridge Universiteit van Landbou waar sy aan die statebond se aartappelversameling gewerk het.[1]

 
Aartappelplante op 'n landery

Tydens hierdie jare kon vroue slegs Girton Kollege of Newnham Kollege in Cambridge bywoon. Keay het by 'n veldtoggroep aangesluit om meer van die kolleges vir vroue te open. Murray Edwards Kollege (wat toe net "New Hall" genoem was) en Lucy Cavendish Kollege wat beide slegs vir vroulike studente was, is kort daarna geopen.[1]

In 1954 het sy na Uganda vertrek, waar sy aangestel is as leser in landboukundige plantkunde aan die Fakulteit Landbou van Makerere Kollege (nou Makere Universiteit) in Kampala. In 1960 is sy as departementshoof aangestel en in 1962 as Dekaan van die Fakulteit van Landbou. In haar tyd in Uganda het sy gehelp om 'n beursfonds te stig vir die sekondêre opleiding van meisies in Uganda. Sy was ook 'n lid van die Uganda-stigting vir Blindes.[1]

In 1964 het sy na Nigerië verhuis waar sy as senior plantpatoloog by die Instituut vir Landbounavorsing van die Ahmadu Bello Universiteit aangestel is. Sy het lesings in klimatologie; plantmorfologie en -patologie; en die plantkunde van Oos-Afrikaanse gewasplante aangebied. Vanaf 1968 is sy aangestel as professor en departementshoof van oesbeskerming.[1]

Keay het in 1971 op 60-jarige ouderdom haar pos by die Universiteit van Ahmadu Bello opgesê en oorgeskuif na Wye College, Kent. In 1972 is sy aangestel as dekaan van vrouestudente by Wye College[1] en is 'n DBE toegeken.[2] Sy het in 1976 afgetree en verskuif na die Departement van Toegepaste Biologie in Cambridge tot sy sluiting in 1989. Sy is in 1998 in Cambridge oorlede.[1]

VerwysingsWysig

  1. 1,0 1,1 1,2 1,3 1,4 1,5 1,6 "Obituary: Margaret Keay" (in Engels). 14 November 1998. Geargiveer vanaf die oorspronklike op 6 Julie 2019.
  2. (en) "SUPPLEMENT TO THE LONDON GAZETTE" (PDF). The London Gazette. 1 Januarie 1972. p. 19. Besoek op 28 Februarie 2019.

Eksterne skakelsWysig