Mary Moffat Museum

Die Mary Moffat Museum is ‘n beskeie museum gewy aan die geskiedenis van die Griekwas, Griekwastad en Griekwaland-Wes.

Agtergrond

In 1804 het William Anderson en Cornelius Kramer van die Londense Sendinggenootskap (LSG) die eerste sendingstasie noord van die Oranjerivier by Klaarwater gestig. John Campbell het in 1813 die naam na Griekwastad verander.

Gebou

Die gebou waarin die museum gehuisves word, is in 1824 deur Robert Moffat voltooi en het as kerk sowel as woonhuis vir die Moffat-gesin gedien. Griekwastad is in 1897 vanaf die stoep van hierdie gebou uitgemeet. Mary, die oudste dogter van die gesin en later die vrou van David Livingstone, is in 1821 in die huis gebore. Die LSG het die gebou in 1903 aan ‘n bankgroep verkoop wat dit later as huisvesting vir ‘n dorpsmuseum beskikbaar gestel het. In 1970 is die gebou ingrypend tot sy oorspronklike toestand gerestoureer, met ‘n riet dak, klip mure en vensters en deure soos dit twee honderd jaar daaruit gesien het.

Versameling

Die versameling weerspieël die geskiedenis van die Griekwa-mense, en veral van Andries Waterboer en Robert Moffat en sy sendingwerk. Tydens sy verblyf in Griekwastad het Moffat self ‘n preekstoel gebou wat hy, sowel as Livingstone en Waterboer gebruik het. Hierdie unieke item is in 1936 tot kultuurmonument verklaar. 'n Oortollige skeepsklok is in 1803 op die rug van ‘n os van Kaapstad hierheen gebring om as kerkklok diens te doen. Die orrel wat op die sendingpos gebruik is, staan nog in die gebou. In die museum is sekere persoonlike besittings van Waterboer sowel as die grafsteen van sy seun Nicolaas Waterboer. Daar is 19de eeuse klerasie, vuurwapens, gereedskap, briewe, dokumente, klipwerktuie gebruik deur die vroegste bewoners van die streek en ‘n kopie van die enigste afbeelding van Mary Moffat.

Persone

• William Anderson (*Londen, 1 Desember 1769 - †Pacaltsdorp, 24 September 1852)
• Cornelius Kramer, werksaam as LSG-sendeling in die jare 1799 – 1820

Bronnelys

• du Preez, H.M.J. (samesteller): Museums of the Cape. Kaapstad: Departement van Natuur- en Omgewingsbewaring, Kaapse Provinsiale Administrasie, 1982. ISBN 0-7984-0114-1
• Fransen, Hans (samesteller): Guide to the museums of Southern Africa. Kaapstad: Suid-Afrikaanse Museumvereniging, 1978
• Standard Encyclopaedia of Southern Africa, deel 7. Kaapstad: Nasou, 1972. ISBN 0-625-0032303