Michaelis-versameling
Die Michaelis-versameling in die Burgerwaghuis aan die Groentemarkplein in Kaapstad bestaan uit 16de, 17de en 18de eeuse Hollandse en Vlaamse skilderye.
'n Versameling van 68 skilderye is op 16 Mei 1914 deur sir Max Michaelis aan die volk van Suid-Afrika geskenk uit dankbaarheid vir wat die land vir hom beteken het nadat lady Florence Phillips hom daartoe aangemoedig het. Op versoek van Michaelis het sir Hugh Lane hierdie versameling opgebou. Op 2 Oktober 1916 is die galery geopen, maar die formele opening het eers op 8 Mei 1917 plaasgevind.
In 1923 vergroot Michaelis die uitstalling deur 21 skilderye uit sy privaat versameling aan die kunsgalery te leen. Na sy dood skenk sy weduwee die skilderye ook aan die Michaelis-kunsgalery. Sedertdien is nog verskeie skilderye aangekoop. Hierdie uitstalling gee 'n besonder verteenwoordigende beeld van die 17de eeuse Nederlandse skilderkuns. Dit was juis Michaelis se doel met die skenking, aangesien dit die tyd was van die Nederlandse vestiging aan die Kaap.
Die skildery Portret van 'n jong vrou met 'n meulsteenkraag deur Frans Hals (ca. 1583–1666) is die bekendste skildery uit hierdie periode in Suid-Afrika. Dit is in 1644 in olieverf op seildoek geskilder en is 75,9 cm by 62,5 cm groot. Die naam van die vrou is onbekend. Dit is in 1913 deur sir Hugh Lane vir sir Max Michaelis aangekoop.
Veral om nog drie ander skilderye is hierdie versameling onder kunskenners bekend: 'n genereskildery deur Jan Steen (ca. 1625–1679), die kerkinterieur van die St. Jans te Gouda deur Hendrik Cornelis van Vliet (1611-1675) en een van die paar skilderye bekend as die Voëlkonsert deur Frans Snijders (1579–1657).
Daar is twee tipiese riviertonele deur Jan van Goyen (1596–1656), landskappe deur die meesters Philips de Koninck (1619–1688), Jacob van Ruysdael (ca. 1628–1682), Albert Cuyp (1620–16910) en Aert van der Neer (1603/4–1677), portrette deur Anthony van Dyck (1599–1641), Nicolaes Maes (1634–93) en Paulus Moreelse (1571–1638), seetonele deur Ludolph Backhuysen (1630–1708) en Hendrick Dubbels (1621–1707), interieurs deur David Teniers jr. (1610–90), Gabriël Metsu (ca. 1629–67) en Pieter de Hooch (1629–84), stillewes deur Willem van Aelst (1625/6–ca. 1683), Abraham van Beijeren (ca. 1620–1690) en Jan Davidsz. De Heem (1606–1683/4), dierestudies deur Frans Snijders (1579–1657), Jan Weenix (1640/1–1719) en Philips Wouwerman (1619–1668), kerkinterieurs deur Emanuel de Witte (1617–1692) en Gerard Houckgeest (ca. 1600–1661). Onder die ander bekende skilders wat in die versameling verteenwoordig word, is Pieter Coecke van Aelst (1502–1550) en Karel du Jardin (1626–1678).
Verder is daar 'n goeie versameling etse en gravures uit dieselfde era. Dit sluit werke van Rembrandt van Rijn (1606/7–1669) in.
In die galery vind soms wisselende tentoonstellings plaas van werke in openbare en privaat besit. Lesings en vergaderings deur kultuuurorganisasies vind hier plaas.
Skilderye in die Michaelis-versameling
wysig-
Trompe l'oeil with a bust of Adonis – Caesar van Everdingen. -
Selfportret – Catharina van Hemessen. -
Amsterdam egpaar met twee kinders in die park van 'n kasteel – Dirck Van Santvoort. -
Nederlandse skip in buitelandse baai – Ludolf Bakhuizen Duth. -
Berglandskap – Jacob Isaakszoon van Ruisdael. -
Van binne uitkyk op die water – Pieter de Hoogh.
Bibliografie
wysig- Fransen, Hans: Michaelis Collection. The Old Town House. Cape Town. Kaapstad: Waanders, 1966.
- Standard Encyclopaedia of Southern Africa, deel 7. Kaapstad: Nasou, 1972. ISBN 0-625-00323-3