Middernagson

Die middernagson is 'n verskynsel waarby die son (of 'n deel van die sonskyf) in gebiede noord van die Noordelike Pool- of Arktiese Sirkel en suid van die Suidelike Pool- of Antarktiese Sirkel ook teen middernag sigbaar bly. By helder weer kan die son 24 ure lank ononderbroke waargeneem word. Die aantal dae per jaar, waarop die middernagson skyn, neem in poolwaartse rigting toe.

Noorweë - «Land van die Middernagson». Toerisme-advertensie van 1905

Die middernagson op die Noorse eilandgroep Vesterålen

Saans op 'n pooldag naby Skibotn (Noorweë)

Middernagson by die Noorse Noordkaap (Nordkapp, Julie 2005)

Die Amerikaanse deelstaat Alaska is een van die «Lande van die middernagson»

Die middernagson gooi sy strale oor die oostelike British Mountains in Kanada se Nasionale Ivvavikpark, Yukongebied

Middernagson oor die Ozjogino-meer in Sacha (Jakoetië), 'n federale deelgebied in Rusland se Verre Ooste

Weens die feit dat daar geen menslike nedersettings suid van die Antarktiese Sirkel bestaan nie, word die middernagson gewoonlik veral deur die bewoners van lande en gebiede waargeneem waardeur die Arktiese Sirkel loop, soos Alaska, Kanada, Groenland, Noorweë, Swede, Finland, Rusland en die mees noordelike streke van Ysland.

'n Kwart van Finland se oppervlakte is noord van die Arktiese Sirkel geleë, en by sy mees noordelike punt gaan die son gedurende die somer 73 dae lank nie meer onder nie. In Svalbard (Noorweë), die mees noordelike bewoonde gebied in Europa, is daar tussen 19 April en 23 Augustus geen sononder meer nie. By die Noord- en Suidpool bly die son in die somer selfs ses maande lank ononderbroke sigbaar. Die teenoorgestelde verskynsel, die poolnag, veroorsaak dat die son in die winter 'n half jaar lank dwarsdeur die dag onder die horison bly.