Maak hoofkeuseskerm oop

Korporatiewe en straatbordontwerpe deur Misha Black

Straatbord in Londen se Carnaby Street
British Rail Class 52
London Underground - moltreinwaens uit die 1967-reeks

Sir Misha Black OBE (* 16 Oktober 1910 in Bakoe, Azerbeidjan, Russiese Ryk as Moisey Tcherny; † 11 Oktober 1977 in Londen, Verenigde Koninkryk) was 'n Britse argitek en ontwerper wat beslissende invloed op die ontwikkeling van die 20ste eeuse Britse argitektuur en ontwerpkuns uitgeoefen het.[1] Baanbrekend was Black se konsep van adviesburos as nuwe organiesasievorm vir ontwerpers.

Saam met sy vennote het Black in 1933 die organisasie gevestig wat later as Artists' International Association bekend sou staan. In 1943 het hy saam met Milner Gray en Herbert Read die Londense onderneming Design Research Unit gestig wat as een van die eerste interdissiplinêre praktyke op argitektuur, grafiese ontwerp en binnenshuise ontwerp gefokus het. Black het veral bekendheid verwerf met sy ikoniese ontwerpe vir straatborde in die City of Westminster, Londen asook sy korporatiewe ontwerpe vir London Transport en British Railways.

Tussen 1959 en 1975 was hy professor in nywerheidsontwerp aan die Royal College of Art (RCA) te Londen - as eerste hoogleraar wat vir dié nuutgeskepte leerstoel benoem is. Black het die leerstoel tot sy aftrede beklee. Naas sy akademiese betrokkenheid by die RCA het Black 'n aktiewe rol by Unesco gespeel en was ook betrokke by die stigting van die International Council for the Societies of Industrial Design (ICSID) in 1959. Black het 'n Fellow of the Chartered Society of Designers geword en is met dié organisasie se hoogste toekenning vereer, die Minerva-medalje. Vir sy bydrae tot die ontwikkeling van ontwerp en nywerhede in die Verenigde Koninkryk is hy in 1972 tot ridder geslaan. In die laaste jare van sy loopbaan is hy as voorsitter van die Design & Industries Association (DIA) benoem - 'n pos wat hy vanaf 1974 tot 1976 beklee het.[2]

VerwysingsWysig