Montérégie

Montérégie is 'n administratiewe gebied aan die suidoewer van die Sint-Laurensrivier in die Kanadese provinsie Quebec met 'n oppervlakte van 11 127,74 vierkante kilometer en 'n bevolking van 1 508 127 (in 2014). Die bevolkingsdigtheid is 135,5 inwoners per vierkante kilometer.

Geografie

Montérégie: Mont Saint-Hilaire

Kantoorgeboue in Longueuil

Montérégie lê teenoor Montreal en grens in die suide aan die Verenigde State van Amerika. Hierdie streek word onder meer oorheers deur talle mere en uitgestrekte groentevelde, appelplantasies en wingerde.

Die gebied se naam, wat op 5 Desember 1985 amptelik ingevoer is, is afgelei van die Montérégie-bergreeks, wat – met die uitsondering van Mont Royal – heeltemal in die gebied lê en met sy bergpieke Saint-Hilaire, Rougemont, Yamaska, Saint-Grégoire, Saint-Bruno en Rigaud vanaf die Montrealeiland tot by die Appalagge-bergreeks strek.

'n Aantal groot riviere soos die Richelieu, Yamaska en L'Acadie vloei deur Montérégie.

Montérégie bestaan in administratiewe opsig uit veertien streeksdistrikte (Frans: municipalités régionales de comté [MRC]) en 176 munisipaliteite. Montérégie behels sowel stedelike asook landelike gebiede.

Demografie

Montérégie huisves 18,1 persent van Québec se totale bevolking en is die derde mees digbevolkte administratiewe gebied in die provinsie. Die bevolking is merendeels saamgetrek naby die Sint-Laurensrivier, aan die suidoewer van Montréal. Die belangrikste nedersettings is Boucherville, Brossard, Granby, Longueuil, Sorel-Tracy, Saint-Jean-sur-Richelieu en Saint-Hyacinthe.

Ekonomie

Landbou, nywerhede, dienste en toerisme vorm die ekonomiese basis van die gebied. Montérégie, wat ook die "Tuin van Québec" genoem word is, is die provinsie se belangrikste produsent van appels en sider, wyn en kaas. Die plaaslike Sider- en Wynroetes is gewilde toeristebestemmings.

Die plaaslike wynbou trek voordeel uit Montérégie se mikroklimaat wat met meer sonskyndae as enige ander gebied in Québec pronk. 'n Twaalftal wynbouers het in die vroeë 1980's hulle tamatie- en aartappelvelde met uitgestrekte wingerde vervang. Langs die Wynroete (Route 202, Frans: Chemin des Vignobles) word naas witwyn selfs druiwe vir rooiwyn verbou wat met Kaliforniese wyne kan meeding.

Eksterne skakels

(fr) Die amptelike webwerf van Montérégie Geargiveer 8 Mei 2007 op Wayback Machine