NG gemeente Albertinia

Die NG gemeente Albertinia is ’n gemeente van die Nederduitse Gereformeerde Kerk in die suide van die provinsie Wes-Kaap met sy middelpunt op die dorp Albertinia.

Albertinia se kerkgebou is die oggend van 18 Junie 1904 ingewy en die gemeente in die namiddag van Riversdal afgestig.

Ds. J.W. Snyman, leraar van 1921 tot 1926.

Dr. Servaas Rossouw was Albertinia se leraar van 1926 tot 1930.

Ds. S.A. Struwig, medeleraar van 1950 tot 1958.

Ds. en mev. P.W.J. van Jaarsveld, leraarspaar van 1948 tot 1954.

Die gemeente Albertinia het begin as 'n voorpos van die gemeente Riversdal. Teen die einde van die 19de eeu het ds. J.R. Albertyn, destyds predikant van Riversdal, die kerkraad daartoe probeer beweeg om 'n kerkplaas iewers in die oostelike deel van die gemeente aan te koop, waar 'n tweede leraar van die gemeente kon diens doen. Dog by vertrek was sy ideaal nog nie verwesenlik nie. Sy opvolger, ds. W.A. Joubert (1893–'97), se pogings het ook misluk.

Eers gedurende die bediening van ds. G.F. Marais het die kerkraad van Riversdal op 11 September 1898 besluit om die plasie Grootfontein van die weduwee Annie Louwrens teen £750 te koop. Op 2 September 1899 is beskuit om 'n pastorie te Grootfontein te bou. Vanaf 1 Oktober 1899 sou gereelde dienste te Grootfontein deur die ouderlinge waargeneem word. Op 20 Januarie 1900 is prop. Malan te Riversdal georden en bevestig met werkkring te Grootfontein. Op daardie datum is deur die kerkraad besluit om hierdie nuwe dorpie Albertinia te noem, as blyk van erkenning van die werk wat ds. Albertyn verrig het om hierdie nuwe gemeente en dorpie tot stand te bring.

In 1901 is 'n begin gemaak met die bou van 'n kerk. Intussen moes die werk gestaak word weens die Tweede vryheidsoorlog en eers weer in 1903 kon daarmee voortgegaan word. Op 18 Junie 1904 is die kerkgebou toe in die voormiddag ingewy en in die namiddag is die nuwe gemeente Albertinia gestig. Op dieselfde dag is ds. David Johannes Malan eenparig tot herder en leraar van die gemeente beroep en op 20 Julie is hy hier bevestig.

Ná sy vertrek in 1905 (hy is op 30 Desember 1905 oorlede) het 'n periode van vinnige uitbreiding sowel as toename in die ledetal van die gemeente onder die geestelike bearbeiding van die volgende leraars gevolg: di. J.A. Koch (1905–'14), J.F. Marais (1914–'17), P. W. de Klerk (1918–'21), J.W. Snyman (1921–'25), dr. S.H. Rossouw (1926–'30), di. J.F. Marais (1930–'38) en P.W. de Lange (1938–'45). Gedurende die tyd van ds. F.R. Grobbelaar (1945—'48) is besluit om 'n medeleraar te beroep. Op 13 November 1948 word ds. P.W.J. van Jaarsveld bevestig en word ds. S.A. Struwig op 4 Februarie 1950 medeleraar.

Enkele leraars

• Jacobus Wilhelmus Snyman, 1921–1926
• Dr. Servaas Rossouw, 1926–1930
• Izak de Villiers, 1963–1969
• Frederik Jacobus Smit, ? – 30 April 2021 (aanvaar sy emeritaat)
• M.H. le Roux, ? – 31 Julie 2021 (aanvaar sy emeritaat)

Bronne

• (nl) Maeder, ds. G.A. en Zinn, Christian. 1917. Ons Kerk Album. Kaapstad: Ons Kerk Album Maatschappij Bpkt.
• (af) Olivier, ds. P.L. (samesteller), 1952. Ons gemeentelike feesalbum. Kaapstad en Pretoria: N.G. Kerk-uitgewers.