NG gemeente Bulawayo-Noord
Die NG gemeente Bulawayo-Noord was 'n gemeente van die Nederduitse Gereformeerde Kerk, gesetel in die voorstad Kingsdale van Rhodesië se naasgrootste stad, Bulawayo, waar Afrikaners ’n saaltjie gebou het (na dienste van die A.E.B. onder leiding van mnr. Von Staden). Die gemeente is amptelik op 7 Junie 1952 van die moedergemeente, NG gemeente Bulawayo, afgestig.
Die Sondagskool is begin deur Robbie Vlok (middel), sy ma (katkisante) en sy vrou (kleintjies). Een van die katkisante was die latere ds. David Steyn van Enkeldoorn (1968-'71) en Gatooma (1973-'80). Dit het later die kern geword van die NG gemeente Bulawayo-Noord, waar gemeentelede ’n kerkgebou en pastorie opgerig het. Die eerste leraar van die pas afgestigte gemeente was ds. Septimus Boshoff, wat in 1952 in die moedergemeente ontvang is, maar dieselfde jaar nog na die nuwe dogtergemeente beroep word.
Met die uittog van Afrikaanse lidmate in die aanloop tot Zimbabwe se onafhanklikwording is die kerkkompleks later aan ’n Engelse genootskap verkoop en die gemeente by die moedergemeente ingelyf.
In 1972 het Bulawayo-Noord 314 belydende lidmate gehad, maar teen 1978 net 207. Van 1963 tot 1967 is die leraar ds. Rossouw Hurter. Sy opvolger, ds. Phil Olivier, was Bulawayo-Noord se laaste eie leraar. Hy word in 1967 bevestig en van 1972 is Wankie ook by sy bediening gevoeg. In 1973 aanvaar hy ’n beroep Vrystaat toe en verlaat Rhodesië. Die laaste leraar was ds. Jacob Badenhorst wat Bulawayo-Noord en Wankie van 1973 tot 1977 in kombinasie bedien het. Wankie se laaste eie leraar was ds. Christoffel Hieronymus Delport wat van 1965 ’n kapelaan in die Rhodesiese Weermag was en in 1969 in Wankie bevestig is. In 1972 keer hy terug Suid-Afrika toe.
Enkele leraars
wysig- Septimus Boshoff, 1952 - 1957
- Petrus Johannes Terblanche, 1957 - 1962
- Rossouw Hurter, 1963 – 1967
- Phil Olivier, 1967 - 1973 (van 1972 in kombinasie met Wankie (Hwange)
- Jacob Andries Cornelius Badenhorst, 1973 - 1977 (in kombinasie met Wankie (Hwange)