NG gemeente Kroonrand

Die NG gemeente Kroonrand was 'n gemeente van die Nederduitse Gereformeerde Kerk in die Ring van Turffontein en die Sinode Hoëveld.

Die kerkgebou afgeneem deur die amateurkerkfotograaf John Conroy.

Kroonrand het op 6 September 1961, dieselfde dag as NG gemeente Mondeor van die moedergemeente Johannesburg-Suid afgestig. So vinnig het die Afrikaanse bevolking van die suide van Johannesburg destyds toegeneem dat van die gemeente Johannesburg-Suid ook nog Danie Theron in 1957 en Spioenkop in 1959 kon afstig. Kroonrand en Mondeor was twee van agt gemeentes wat in 1961 in die Sinode van Suid-Transvaal afgestig het. In die aangrensende Noord-Transvaal het in dieselfde jaar ses gemeentes afgestig.

Kroonrand het 10 jaar ná sy stigting 586 belydende en 353 dooplidmate gehad. In 1985 was dit 465 en 219, in 1995 433 en 172 en in 2005 317 en 72. Die gedurige afname het voortgeduur in die volgende 10 jaar, want in 2016 was die syfers 216 en 34.

Ná die naamsverandering en die verengelsing van die Hoërskool J.G. Strijdom en die verengelsing van die Hoërskool Die Fakkel, is dit nog net die nou tweetalige Hoërskool President binne die gemeentegrense van Kroonrand wat sekondêre onderrig in Afrikaans in die suide van Johannesburg aanbied.

Kroonrand is omstreeks 2019 of 2020 by Deo Gloria ingelyf, wat sedertdien bekendstaan as Deo Gloria Gemeenskapskerk.

Bron

• (af) Olivier, ds. P.L. (samesteller). (1952). Ons gemeentelike feesalbum. Kaapstad en Pretoria: N.G. Kerk-uitgewers.