NG gemeente Louisvale
Die NG gemeente Louisvale is ’n gemeente in die weste van die Sinode Noord-Kaapland, ’n streeksinode van die Nederduitse Gereformeerde Kerk in Suid-Afrika.
Die gemeente Louisvale is in 1932 as Grootrivier gestig, maar nadat drie wyke in 1949 van Grootrivier afgestig het, het die moedergemeente se naam verander na Louisvale, terwyl die dogtergemeente die moedergemeente se naam aangeneem en as NG gemeente Grootrivier bekendgestaan het.
In die Kerkbode van 11 Januarie 1933 verskyn die volgende berig onder die opskrif “Stigting van nuwe gemeente”: “Hiermee word kennis gegee dat daar volgens 'n offisiële berig van die H.E. Scriba van die Ring van Upington op 10 Des. 1932 'n nuwe gemeente in gemelde Ring gestig is. Die besonderhede is as volg: Die naam van die gemeente is ‘Grootrivier'. Die grense van die gemeente is die van die ou gemeente Upington suid van die Oranjerivier. Die nuwe gemeente Grootrivier bestaan dus uit al die rivierplase ten suide van die Oranjerivier, van die westelike grens van Grootdrink tot die oostelike grens van Blaauwskop, insluitende die nedersettings Louisvale, Vaalkoppies en Karos . . ."
Op die eerste gekombineerde kerkraadsvergadering, gehou op 23 Januarie 1933, is ds. D.F. du Toit, tweede leraar van Upington, na die nuwe gemeente beroep. Hy het die beroep aangeneem. Ds. Du Toit het in die nuwe gemeente baanbrekerswerk in die ware sin van die woord gedoen. Die gemeente was uitgestrek, die paaie uiters treurig, sy gemeentelede het baie verspreid gewoon, daar was nie 'n sentrale of liewer geen pastorie nie, en die eredienste moes in enige gebou wat beskikbaar was, gehou word. Verder is ds. Du Toit swaar getref deur die dood van sy eggenote slegs 'n paar maande ná hul huwelik. Ten spyte van al die teenslae en struikelblokke, het hy nogtans sy werk met prysenswaardige ywer en nougesetheid verrig.
Nadat ds. Du Toit in 1938 'n beroep na Groot-Brakrivier aangeneem het, is hy opgevolg deur ds. W. Fullard, wat as hulpprediker in die gemeente gearbei het. Eers tydens sy bediening is 'n pastorie vir die gemeente aangekoop. Ds. Fullard is opgevolg deur ds. C.M. Oosthuizen, wat slegs 18 maande in die gemeente werksaam was.
Die gemeente was gelukkig om spoedig 'n nuwe leraar in die persoon van ds. B.J. Cronje te kry. Ds. Cronje het met groot ywer voortgegaan met die taak waarmee ds. Fullard begin het, naamlik die insameling van geld vir die bou van 'n kerk op Louisvale. Tydens ds. Cronje se bediening stig die wyke Vaalkoppies, Matjiesrivier en Karos af, en vorm saam die nuwe gemeente Grootrivier. Die moedergemeente sou voortaan onder die naam Louisvale bekendstaan. Die volgende predikant was ds. G.J.U. Rothman. In sy tyd het die gemeente die hoop gekoester om spoedig ’n nuwe en sierlike kerkgebou op te rig.
Bron wysig
- Olivier, ds. P.L. (samesteller). 1952. Ons gemeentelike feesalbum. Kaapstad en Pretoria: N.G. Kerk-uitgewers.