NG gemeente Noordhoek

Die NG gemeente Noordhoek is ’n gemeente in die Nederduitse Gereformeerde Kerk se Vrystaatse Sinode.

Die gemeente se kerkgebou is blykbaar een van Gerard Moerdyk se laaste kerkontwerpe.

Vooraansig van die kerkgebou.

AS gevolg van die snelle uitbreiding van die stad Bloemfontein in die jare veertig, veral aan die noordoostekant, het die NG gemeente De Bloem so groot geword dat die afstigting van 'n nuwe gemeente noodsaaklik geword het. Op 'n kerkraadsvergadering van die gemeente De Bloem, gehou op 18 November 1948, is afstigting bespreek en toestemming tot die stigting van 'n nuwe gemeente gegee. Op 23 April 1949 is 'n afstigtingsvergadering in die saal van die Noordskool gehou en is 'n nuwe gemeente van die gemeente De Bloem afgestig. Uit 'n paar name voorgestel is Noordhoek as die naam van die nuwe gemeente vasgestel. As konsulent is ds. G. Thom van Bloemfontein-Oos aangestel. G.M. Burger is aangestel as die eerste scriba-kassier en mev. J.C. Pauw as die eerste orreliste.

Nadat die gemeente vyf maande met veel vrug deur ds. J.G. Strydom, oudsendingsekretaris van die Vrystaatse Kerk, bearbei is, is ds. P.J. Janse van Rensburg op 4 Februarie 1950 as die eerste leraar van die gemeente bevestig. Binne die eerste drie jaar ná afstigting het die gemeente met rasse skrede vooruitgegaan. Die getal lidmate het van ongeveer 750 tot byna 1 000 aangegroei. Toe het reeds bloeiende takke van die Vrouesendingbond, Strewersvereniging en Kinderkrans in die gemeente bestaan. Daar was reeds 'n pragtige nuwe pastorie en planne vir 'n kerkgebou is binne twee jaar ná afstigting opgestel. Dié gebou was glo een van Gerard Moerdyk se laaste kerkontwerpe.

Einde 1984, toe die gemeente 35 jaar oud was, was hier nog 1 039 belydende en 425 dooplidmate, terwyl die moedergemeente De Bloem onderskeidelik 1 592 en 550 gehad het. Nog 35 jaar later, einde 2014 toe Noordhoek 70 jaar oud was, het die belydende lidmate afgeneem tot 233 en die dooplimate tot 90. De Bloem se lidmaattalle was toe onderskeidelik 730 en 95. In 2022 se NG Kerk Jaarboek is Noordhoek se belydende lidmate aangedui as 199 en die dooplidmate 39. De Bloem was toe 710 en 60.

Bronne

• (af) Olivier, ds. P.L. (samesteller). 1952. Ons gemeentelike feesalbum. Kaapstad en Pretoria: N.G. Kerk-uitgewers.