Nederburg

Nederburg in die Boland is een van die mees vooraanstaande en toonaangewendste wynplase in Suid-Afrika.

Ligging

Die plaas is by 33° 43′ 17″ suid, 19° 0′ 18″ oos, in Dal Josafat in die Paarl. Dit is aan die oostekant van die vallei van die Bergrivier en aan die voetheuwels van die Klein-Drakensteinberge. Aansienlike wisseling in hoogte bo seespieël en in grondsoorte maak dit ‘n unieke wingerdplaas. Ook die wisseling in die rigting van die hellings veroorsaak dat die vallei, wat baie warm word in die somer, aanhoudend aan die veranderende suidoostewind onderhewig is.

Wynplaas

Johann Georg Graue, ‘n immigrant uit Hamburg, Duitsland, word in 1937 die eienaar. Vanaf 1953 wen hy met sy wyne verskeie toekennings en maak Nederburg ‘n bekende naam in die wynbedryf. As wynmaker word hy opgevolg deur Werner Thielscher, Horst Saalwächter en in Februarie 1956 deur Günter Brözel. Monis, ‘n bekende Paarlse wynfirma, met hul wynmaker E.N. Costa, neem in Julie 1956 die beheer oor. Daarna kom Nederburg in besit van die Stellenbosch-wyntrust, gevolg deur Distell en vroeg in die 21ste eeu is Heineken die eienaar. Nederburg se wyne Edelrood, Fonternel en Edelkeur raak alombekend. ‘n Jaarlikse veiling van Suid-Afrikaanse wyn vind sedert 1975 in Februarie of Maart op die landgoed plaas. Alle bekende wynprodusente probeer hier hul wyne aan die groothandelaars verkoop.

Herehuis

In 1791 is die plaas van 49 ha toegeken aan Philippus Bernardus Wolvaard. Hy noem die plaas Nederburg na die VOC-amptenaar Sebastiaan Cornelis Nederburgh. Wolvaard bou die huis in 1800. Tot in die middel van die 20ste eeu was dit nog die enigste groot huis uit die periode van ‘n eeu en ‘n half tevore wat ongeskonde die tyd deurstaan het en is daarom destyds tot monument verklaar. Die huis het ‘n H-vormige uitleg met stoepe (aanvanklik met rooi teëls) rondom. Van die ses gewels aan die gebou is die voor- en agtergewels goeie voorbeelde van die Kaaps-Hollandse styl. In die spoggerige interieur is die ingeboude kaste meesterstukke. Later jare is ‘n moderne wynkelder aangebou.

Lees ook

• Lys van wynkelders in Suid-Afrika

Bibliografie

• Bulpin, T.V.: Discovering Southern Africa. Kaapstad: Books of Africa, 1983. ISBN 0-949956-17-1
• Fransen, Hans (samesteller): Old buildings of the Cape. A survey of extant architecture from before c1910 in the area of Cape Town, Calvinia, Colesberg, Uitenhage. Kaapstad: Jonathan Ball, 200. ISBN 1-86842-191-0

Eksterne skakels

• Amptelike webwerf