Sebastiaan Cornelis Nederburgh

Sebastiaan Cornelis Nederburgh (Den Haag, 7 Maart 1762 tot Den Haag, 3 Augustus 1811 was 'n kommissaris-generaal van die Verenigde Oos-Indiese Kompanjie (VOC).

Sebastiaan Cornelis Nederburgh
Kommissaris-generaal van die Nederlandse Kaapkolonie saam met Simon Hendrik Frijkenius
Ampstermyn 1792 – 1793
Voorafgegaan deur	Johannes Izaac Rhenius (wnd.)
Opgevolg deur	Abraham Josias Sluysken
Persoonlike besonderhede
Gebore	7 Maart 1762 Den Haag, Nederland
Sterf	3 Augustus 1811 Den Haag, Nederland
Alma mater	Universiteit van Leiden

Hy skryf hom in 1777 as student in aan die Universiteit van Leiden en promoveer vyf jaar later in die regte. In 1785 word hy aangestel as advokaat in die Raad van State in die State-generaal en twee jaar later as eerste advokaat van die VOC, waardeur hy ontwerper van al die Kompanjie se uitgaande stukke en ook sy verteenwoordiger in die State-generaal word. Dié liggaam gee hom in 1787 opdrag om saam met Simon Hendrik Frijkenius streng ondersoek in te stel na die sake van die Kompanjie aan die Kaap en in die Ooste en al die nodige te doen om die toestand te verbeter. Aan die Kaap onderdruk die twee kommissarisse-generaal die sluikhandel, stel 'n nuwe belasting in en rig die Bank van Lening op.

Nederburgh vertrek in 1793 na Batavia waar hy ingrypende veranderinge aanbring en met groot moeilikheid te doen kry. Ses jaar later neem hy sy ontslag en keer terug na sy geboorteland, waar hy in 1809 lid van die Asiatiese Raad word. Dié liggaam is in die lewe geroep om in die plek van die mislukte VOC die Oosterse besettings te administreer. Hy sterf in 1811 in sy geboortestad.

Sien ook

• Lys van kommandeurs en goewerneurs van die Kaapkolonie

Bron

• Albertyn, dr. C.F. (red.), 1972. Afrikaanse Kinderensiklopedie. Kaapstad: Nasionale Boekhandel Beperk.

Voorafgegaan deur Johannes Izaac Rhenius (waarnemend)

Kommissaris-generaal van die Nederlandse Kaapkolonie saam met Simon Hendrik Frijkenius 1792 – 1793

Opgevolg deur Abraham Josias Sluysken