Nerissa en Katherine Bowes-Lyon
Nerissa Bowes-Lyon (18 Februarie 1919 - 22 Januarie 1986) en Katherine Bowes-Lyon (4 Julie 1926 - 23 Februarie 2014)[1] was twee van die dogters van John Herbert Bowes-Lyon en sy vrou, Fenella (gebore Hepburn-Stuart-Forbes-Trefusis). John was die broer van lady Elizabeth Bowes-Lyon, die koninginmoeder. Die twee susters was dus niggies van koningin Elizabeth II en prinses Margaret – die vroue se gesamentlike oupa en ouma was Claude Bowes-Lyon, 14de Graaf van Strathmore en Kinghorne, en Cecilia Bowes-Lyon, Gravin van Strathmore en Kinghorne.[2]
Nerissa Bowes-Lyon | |
|---|---|
| Gebore | 18 Februarie 1919 |
| Sterf | 22 Februarie 1986 (op 67) Redhill, Engeland |
| Bekend vir | Lid van die Britse koninklike familie |
Katherine Bowes-Lyon | |
|---|---|
| Gebore | 4 Julie 1926 Engeland |
| Sterf | 23 Februarie 2014 (op 87) Redhill, Engeland |
| Bekend vir | Lid van die Britse koninklike familie |
Agtergrond
wysigNerissa Bowes-Lyon is op 18 Februarie 1919 en Katherine Bowes-Lyon op 4 Julie 1926 gebore as die dogters van John Herbert Bowes-Lyon en sy vrou, Fenella Hepburn-Stuart-Forbes-Trefusis. Hulle pa, die tweede oudste seun van Claude Bowes-Lyon, 14de Graaf van Strathmore en Kinghorne, en Cecilia Bowes-Lyon, Gravin van Strathmore en Kinghorne, was die broer van lady Elizabeth Bowes-Lyon, die toekomstige koningin Elizabeth die koninginmoeder. Hulle moeder was die jongste dogter van Charles Hepburn-Stuart-Forbes-Trefusis, 21ste baron Clinton.
In 1987 is onthul dat Nerissa en Katherine nog lewe, hoewel die 1963-uitgawe van Burke's Peerage die susters se sterfdatums aangee as onderskeidelik 1940 en 1961.[1][3] Die twee is in 1941 opgeneem in die Earlswood-hospitaal vir mense met 'n geestelike gebrek. In die destydse terminologie is albei as "imbesiele" geklassifiseer, en nie een van hulle het leer praat nie.[4]
Nerissa is in 1986 op 66-jarige leeftyd oorlede, met net die hospitaalpersoneel wat die begrafnis bygewoon het,[4] en Katherine is in 2014 op 86 oorlede.[5] Die susters het geen geld van die familie ontvang nie, buiten £125 per jaar wat aan Earlswood betaal is.[4] Die hospitaal het in 1997 gesluit.
Omstredenheid
wysigLord Clinton het in 1987 gerugte van 'n koninklike toesmeerdery in die pers ontken en beweer sy tant Fenella (die twee vroue se ma) het die vorm vir Burke's verkeerd ingevul omdat Fenella 'n "vae persoon" was; Burke's het egter spesifieke sterfdatums vir die susters ingesluit.[6] Volgens 'n TV-dokumentêr in 2011 oor die susters, The Queen's Hidden Cousins, wat deur Channel 4 uitgesaai is, is daar geen rekord dat die susters in hulle tyd in die hospitaal "ooit deur enige lid van die Bowes-Lyon- of koninklike familie besoek is nie, ondanks die feit dat hulle tante, die koninginmoeder, 'n beskermpersoon van Mencap is". (Mencap is 'n welsynorganisasie vir mense met leerprobleme).
Verpleegsters het in die dokumentêr gesê sover hulle weet, het die familie nooit vir die susters 'n verjaardag- of Kersgeskenk of -kaartjie gestuur nie. Toe Nerissa in 1986 sterf, het niemand van haar familie die begrafnis bygewoon nie. Sy is in die Redhill-begraafplaas begrawe[7] en haar graf is met plastieketikette en 'n reeksnommer gemerk, totdat haar bestaan in die media onthul is. Haar familie het daarna 'n grafsteen laat oprig.[1][6][8]
Ander familielede
wysigDrie niggies van die susters wat ook geestelike gebreke gehad het, het ook in Earlswood-hospitaal gewoon. Harriet Hepburn-Stuart-Forbes-Trefusis (1887-1958), suster van Nerissa en Katherine se ma, Fenella, het getrou met majoor Henry Nevile Fane, en drie van haar sewe kinders het in Earlswood gewoon: Idonea Elizabeth Fane (1912-2002), Rosemary Jean Fane (1914-1972) en Etheldreda Flavia Fane (1922-1996).[9] David Danks, destyds direkteur van die Murdoch-kindernavorsingsinstituut,[10] het gemeen 'n genetiese siekte in die Hepburn-Stuart-Forbes-Trefusis-familie[11] het dalk die vroeë dood van manlike familielede veroorsaak, asook leerprobleme in vroulike lede.[12] In 1996 is die oorlewende niggies na die Ketwin House-versorgingsoord in Surrey gestuur.[13] Toe dit in 2001 sluit, is hulle na 'n ander versorgingsoord in Surrey geskuif.[7]
Anne Tennant, barones Glenconner, was as 'n jong vrou en 1950 se debutante van die jaar verloof aan Johnnie, burggraaf Althorp, later graaf Spencer en pa van prinses Diana. Sy pa het beswaar teen die huwelik aangeteken op grond van "mal bloed", want een van Anne se oumas was 'n Trefusis. Die verlowing is toe verbreek.[14]
The Queen's Hidden Cousins
wysigIn November 2011 het Channel 4 'n dokumentêr oor die susters uitgesaai met die naam The Queen's Hidden Cousins. Die regisseur was Kelly Close en die program is gemaak deur Minnow Films, 'n onafhanklike maatskappy, wat die program so opgesom het: "Terwyl hulle susters, Diana en Anne, 'n bevoorregte lewe gelei en in die hoogste vlakke van die aristokrasie opgeneem is, was Katherine en Nerissa so te sê vergete en is hulle uit die familiegeskiedenis geskryf." Deur die individue se verhaal te vertel en die getuienis te gebruik van diegene wat saam met hulle in die inrigting woon, was die doel van die prent "om die veranderende houdings jeens leerprobleme oor die 20ste eeu in die Britse gemeenskap in konteks te plaas".[15]
Voor die uitsending het die koerant Daily Express berig die koningin is "hoogs ontsteld" daardeur. Lady Elizabeth Shakerley, geleentheidsbeplanner van die koningin en dogter van een van die ander Bowes-Lyon-niggies, het lang kommentaar gelewer en dit gekritiseer.[16] Sy het dit "wreed" en "indringerig" genoem en gesê Katherine en Nerissa "was allesbehalwe 'n taboe onderwerp", maar deel van die familie as susters van haar ma, wyle prinses Anne van Denemarke.
The Daily Telegraph het die dokumentêr as "hartseer, maar onthullend" beskryf. Nadat die program uitgesaai is, het die resensent John Grace van The Guardian gesê: "Alles wat gesê is, is algemene kennis." Crace het gemeen dit is Nerissa se dood in 1986 wat die poniekoerante se belangstelling in die verhaal die volgende jaar geprikkel het. Hy het kritiek uitgespreek op die feit dat geen poging aangewend is om uit te vind hoekom die susters in 1941 in die hospitaal geplaas is nie. Hy het geskryf: "Dit is die een deel van die storie wat regtig nog 'n raaisel is."[17]
The Crown
wysigDis susters kom voor in die sewende episode, "The Hereditary Principle", van die vierde seisoen van Netflix se dramareeks The Crown, wat sy première in 2020 gehad het.[5]
Verwysings
wysig- ↑ 1,0 1,1 1,2 "The Queen's Hidden Cousins". Channel 4. Geargiveer vanaf die oorspronklike op 21 Julie 2012. Besoek op 14 November 2020.
- ↑ Descendancy for Bowes-Lyon Claude George, 14th Earl of Strathmore & Kinghorn at Family History UK Trees, besoek op 14 November 2011.
- ↑ Milne, Brian (15 April 2013). The History and Theory of Children's Citizenship in Contemporary Societies (in Engels). Springer Science & Business Media. ISBN 978-94-007-6521-4.
- ↑ 4,0 4,1 4,2 Goldsbrough, Susannah (12 November 2020). "Neglected, hidden away, registered dead: the tragic true story of the Queen's disabled cousins". The Daily Telegraph. Geargiveer vanaf die oorspronklike op 14 November 2020. Besoek op 14 November 2020.
- ↑ 5,0 5,1 Young, Sarah (13 November 2020). "Who were the Queen's 'hidden cousins', Nerissa and Katherine Bowes-Lyon?". The Independent (in Engels). Besoek op 14 November 2020.
- ↑ 6,0 6,1 "Royal Nieces Cover-up Denied By Lord Clinton", The Glasgow Herald, 8 April 1987.
- ↑ 7,0 7,1 Kathleen Tessaro, The Debutante, HarperCollins UK, 2010, ISBN 0-00-736601-9, ISBN 978-0-00-736601-9, 384 pages ("Authors note")
- ↑ "Books: The Debutante Geargiveer 27 Oktober 2010 op Wayback Machine", at hollywoodtoday.net, besoek op 14 November 2011.
- ↑ "Hon. Harriet Hepburn-Stuart-Forbes-Trefusis" op thePeerage-webtuiste, besoek op 14 November 2011.
- ↑ "The History of the Murdoch Childrens Research Institute Geargiveer 11 September 2011 op Wayback Machine" besoek op 14 November 2011.
- ↑ Coke, Hope (19 November 2020). "Behind The Crown: The true story of the Queen's cousins, Nerissa and Katherine Bowes-Lyon". Tatler. Besoek op 15 Maart 2021.
- ↑ "Bowes-Lyon Retardation Gene May Have Killed Males", The Age, 9 April 1987.
- ↑ Hastings, Chris; Bamber, David; Berry, Jessica (13 Augustus 2000). "Queen's cousin in 'sub-standard' care home". The Daily Telegraph. Geargiveer vanaf die oorspronklike op 14 November 2020. Besoek op 14 November 2020.
- ↑ "Lady in Waiting by Anne Glenconner review – a bestselling glimpse of the royals". the Guardian (in Engels). 7 Desember 2019. Besoek op 17 April 2021.
- ↑ "Minnow Films | The Queen's Hidden Cousins". www.minnowfilms.co.uk. Geargiveer vanaf die oorspronklike op 11 April 2021. Besoek op 11 April 2021.
- ↑ Douglas, Hilary (13 November 2011). "Queen's fury over C4 'lies'". Express.co.uk (in Engels). Besoek op 11 April 2021.
- ↑ "TV review: The Queen's Hidden Cousins; Waking Up To Insomnia; Symphony". The Guardian (in Engels). 17 November 2011. Besoek op 11 April 2021.
Skakels
wysig
Hierdie artikel is in sy geheel of gedeeltelik uit die Engelse Wikipedia vertaal.
