Piet Byleveld
Piet Byleveld (1950–2017) was 'n Suid-Afrikaanse polisiespeurder wat aan talle groot en opspraakwekkende sake gewerk het. Hy het onder andere die moorde op Sheldean Human, Inge Lotz en Leigh Matthews ondersoek. Byleveld het in 2010, na ’n loopbaan van 38 jaar, as 'n brigadier van die Suid-Afrikaanse Polisiediens afgetree. Daarna het hy Piet Byleveld Crime and Commercial Investigations (PBCCI) gestig en begin om misdaadsake in sy persoonlike hoedanigheid te ondersoek.[1]
Piet Byleveld | |
|---|---|
| Gebore | Petrus Erasmus Johannes van Staden Byleveld 1950 |
| Sterf | 24 Mei 2017 (op 67) |
| Nasionaliteit | Suid-Afrika |
| Beroep | Speurder |
| Bekend vir | Oplos van moordsake |
| Titel | Brigadier |
| Eggenoot | Elize Smith |
Lewensloop wysig
PEJ van S Byleveld is in 1950 gebore en het in 1972 by die SAP aangesluit. As polisiebeampte het hy keer op keer die nuusblaaie gehaal. Internasionaal het hy ook die FBI, Scotland Yard, Mossad en die Kanadese polisie met ondersoeke na reeksmoordenaars gehelp.
Een van sy vernaamste sake was die moord op Leigh Matthews. Hy en sy span het Donovan Moodley vasgetrek, wie daarna effektief 40 jaar tronkstraf opgelê is. Danksy Byleveld is die reeksmoordenaar Lazarus Mazingane en Cedric Maake, die Wemmerpan-moordenaar, aan die kaak gestel.
Byleveld het hoofopskrifte gehaal toe hy die sewejarige Sheldean se moordenaar vasgetrek het. Sheldean het op 18 Februarie 2007 verdwyn nadat sy en ’n maatjie saam met Andrew Jordaan van ’n park in die omgewing na ’n kommune in Pretoria Tuine teruggekeer het. Jordaan is in 2008 lewenslank vir die moord gevonnis. Hy het 'n plakboek oor Byleveld besit en is in 2012 in die gevangenis doodgeslaan.
PBCCI se deure is ongeveer 'n jaar voor sy afsterwe sonder kennisgewing gesluit, wat gerugte laat ontstaan het dat Byleveld van sy kliënte ingeloop het. Hy het later aan Rapport gesê: “My werk was altyd my alles, dis hoekom ek so hartseer was toe dinge laasjaar met my kliënte so skeefgeloop het. Ek kan dit steeds nie verwerk dat 40 jaar se loopbaan moes eindig nie. Ek het almal probeer help, maar die verwagtinge was soms buitensporig: ek moes eenvoudig elke saak oplos. En ek kon nie”.
Byleveld is op 24 Mei 2017 in die ouderdom van 67 oorlede. Hy is in Maart 2017 met fase-4-longkanker gediagnoseer en was voor sy dood in die Life Wilgeheuwel-hospitaal in Roodepoort behandel.[2]
Hanlie Retief het 'n boek oor hom geskryf, Byleveld, dossier van ’n baasspeurder.[3] Die TV-reeks, Die Byl, is losweg op sy loopbaan gegrond.
Verwysings wysig
- ↑ Who's Who SA Geargiveer 4 Junie 2017 op Wayback Machine, besoek op 24 Mei 2017
- ↑ Piet Byleveld oorlede, Maroela Media, 24 Mei 2017
- ↑ Retief, Hanlie: Byleveld, dossier van ’n baasspeurder, 1 September 2011, ISBN 978-1-4152-0142-8