Piet de Jager

Piet de Jager (22 Januarie 1953 – 12 Januarie 2023) was ’n Afrikaanse regsgeleerde, wat veral bekendheid verwerf as rolprentmaker en digter.

Lewe en werk

Piet de Jager is in 1953 in Bethal gebore as die seun van Salmon de Jager, ’n landdros. Weens sy pa se beroep trek hulle baie en hy word groot in Kaapstad, Kimberley en Durban. Hy matrikuleer aan die Hoërskool Andrew Rabie in Port Elizabeth. Sy universiteitsopleiding is aan die Universiteit van die Oranje-Vrystaat en hy behaal hier ’n B.A.-graad in die Regte en ’n M.A.-graad in Staatsfilosofie, waarna hy die LL.B.-graad aan die Universiteit van Suid-Afrika verwerf. Hy word in 1982 as advokaat toegelaat tot die Pretoria-balie, waar hy in 1997 senior status (S.C.) verwerf. In sy regsloopbaan is hy betrokke by verskeie opspraakwekkende sake, waaronder die Trojaanse perd-saak van die middel 1980’s, die Harms-kommissie oor korrupsie en die Burgerlike Samewerkingsburo (BSB) van die 1990’s. Hy het sowel generaal Magnus Malan as president P.W. Botha in die hof verdedig. Hy was getroud met Luitha, ’n gimnastiek-afrigter, wat hy op universiteit in Bloemfontein leer ken het, en hulle het in Bronkhorstspruit gewoon. Hulle het vier kinders, drie seuns (Sallas, Dawie en Pieter) en ’n dogter (Elena). Saam met sy seun Sallas begin hy Bosbok 6 Films, ’n produksiemaatskappy wat genoem is na hulle straatadres in Bronkhorstspruit. Op Bronkhorstspruit bedryf hy ook ’n kwekery.

Skryfwerk

Sy gedigte word gebundel in “Ouhout”, wat deur Zerk de Villiers geïllustreer word. Hy vertaal Albert Camus se “La peste” as “Die pes” in Afrikaans. In hierdie boek word die stad Oran deur ’n epidemie vernietig, maar Camus se werk is allegories van aard en verwys enersyds na die Nazi-besetting van Frankryk en andersyds na die menslike kondisie, waar die pes nooit verdwyn nie.

Rolprente

Piet vervaardig ook rolprente en staan so aan die hoof van die vervaardiging van “Roepman” van Jan van Tonder en die fliek oor die Anglo-Boereoorlog, “Verraaiers”, wat deur Albert Blake se boek “Boereverraaiers” geïnspireer is. Hierna volg “Stuur groete vir Mannetjies Roux”, waarin die bekende liedjie van Laurika Rauch ’n groot rol speel, en “Musiek vir die agtergrond. Sy eerste rolprent in Engels is “Losing Molly”, wat gegrond is op die ware verhaal van die struggle-advokaat Bram Fischer se tragiese verval nadat sy vrou in ’n fratsongeluk oorlede is.

Publikasies

Jaar	Publikasie
2005	Ouhout
	Vertaling
2012	Die pes- Albert Camus
	Rolprente
2010	Roepman
2013	Verraaiers
2014	Musiek vir die agtergrond
	Stuur groete vir Mannetjies Roux

Bronnelys

Tydskrifte en koerante

• De Jager, Piet “Oorlog is mense se waansin” “Rapport” 20 Januarie 2013
• Schoombie, Schalk “Die menslike verhaal boei my” “By” 4 Mei 2013
• Stehle, Rudolf “Persoonlike projek lei tot Camus-vertaling” “Beeld” 23 Augustus 2012

Internet

• Blaauw, Danél Huisgenoot: http://huisgenoot.com/fokus/pa-en-seun-kombo-streef-hul-droom-na-nes-in-hul-fliek/^{[dooie skakel]}
• Schoombie, Schalk Netwerk24: http://www.netwerk24.com/Stemme/Aktueel/Die-menslike-verhaal-boei-my-20130503 Geargiveer 3 Oktober 2018 op Wayback Machine