Piet van Maarleveld
Piet van Maarleveld (10 Oktober 1928 – 19 Oktober 2017, algemeen bekend as Piet Fotokuns) was ’n legendariese fotograaf in Potchefstroom wat na raming sowat 1 miljoen foto's geneem het, waarvan sowat 250 000 vir die destydse PU vir CHO, wie se amptelike fotograaf hy van 1983 tot 1990 was, hoewel hy sedert 1959 universiteitsfoto's op die dorp geneem het. Dié kwartmiljoen foto's word in die NWU-argief as die Piet Fotokuns-versameling bewaar.
Koms na Suid-Afrika wysig
Van Maarleveld is in Alkmaar, Nederland, gebore. In 1952 het hy na Suid-Afrika gekom op aanbeveling van sy broer, wat toe reeds na die land geïmmigreer het. Van Maarleveld het eers op Vereeniging en daarna op Sasolburg gaan werk. Eers sowat twee jaar ná sy immigrasie het hy sy verloofde, Ina (nooiensvan nie bekend), na Suid-Afrika laat kom. Hulle moes binne drie maande ná haar koms trou, so nie sou sy moes teruggaan Nederland toe.
Legendariese fotograaf wysig
In 1958 het hy na Potchefstroom gegaan om aan die PU vir CHO te studeer. In dié tyd het hy foto's geneem om sy inkomste aan te vul, maar in sy eie woord kan ’n mens "nie twee here dien nie"; dus het hy sy studie gestaak en hom heeltyds op fotografie toegespits. Op die universiteitsdorp het hy ’n legende geword en uit die staanspoor baie werk vir die PUK gedoen, onder andere as fotograaf vir die universiteit se jaarblad en sy studentekoerant, Die Wapad.
’n Hoogtepunt in sy lang loopbaan was toe die koshuis Gatland (Ons Huis) in 1975 afgebreek is om plek te maak vir die geboue wat later die skool vir sosiale en owerheidstudies sou huisves. Van Maarleveld het gevra dat die slopers hom laat weet wanneer die gewel omgestoot sou word. Dit het vir ’n dramatiese foto gesorg wat vandag saam met duisende ander in die NWU-argief bewaar word.
Koster wysig
Van Maarleveld en sy vrou het van die 1960's tot sy dood in Van der Hoffweg (tans Thabo Mbekirylaan) oorkant die Gereformeerde kerk Potchefstroom-Noord (later Die Bult) gewoon, die kerk by die Teologiese Skool Potchefstroom. Van Maarleveld het self hul huis ontwerp en so te sê eiehandig gehou. Omstreeks 1998 het hy koster van die kerk geword. Na sy mening was ’n koster se werk om toe te sien dat verkondiging van Gods Woord ongesteurd en ordelik verloop; daarom was dit nie vir hom ’n lastigheid of moeite nie.
Hy moes ook sorg dat die kerkhorlosie op tyd bly en moes gereeld die 25 m hoë toring uitklim om die horlosie se ratwerk en elektriese motors te versien.
Ná sy aftrede het hy meer tyd gehad vir sy stokperdjie: modelbote bou. Ook het hy gereeld ’n Nederlandse koerant gelees waaruit hy berigte geknip en dit aan mense gegee het wat syns insiens daarin sou belangstel. Onder hulle was plantkundiges, geoloë en ander wat gereeld die knipsels ontvang het.
Van Maarleveld was (sigaret in die mond) ’n bekende gesig op Potchefstroom, maar het sy gewoonte van 40 sigarette per dag omstreeks 2012 gestaak, toe hy in die hospitaal opgeneem is vir ’n operasie en verbied is om daar te rook.
Bronne wysig
- Gouws, Lennie in Potchefstroom Herald, 28 Maart 2014.