Rainier III van Monaco
Rainier III, Prins van Monaco (Rainier Louis Henri Maxence Bertrand Grimaldi, Graaf van Polignac; 31 Mei 1923 – 6 April 2005), het langer as 50 jaar oor die prinsdom Monaco regeer en was dus een van die langs regerende monarge van die 20ste eeu. Sy volle titel was Sy Deurlugtige Hoogheid die Soewereine Prins van Monaco.
| Rainier III | |
|---|---|
| Prins van Monaco | |
 | |
| Naam | Rainier III |
| Volle naam | Rainier Louis Henri Maxence Bertrand |
| Titel | Sy Deurlugtige Hoogheid die Soewereine Prins van Monaco |
| Bewind | 9 Mei 1949 – 6 April 2005 |
| Gebore | 31 Mei 1923, Monaco |
| Oorlede | 6 April 2005, Monaco |
| Voorganger | Louis II |
| Opvolger | Albert II |
| Eggenote | Grace Kelly |
| Kinders | Caroline, Prinses van Hannover Albert II van Monaco Prinses Stéphanie van Monaco |
| Huis | Grimaldi |
| Vader | Prins Pierre, Hertog van Valentinois |
| Moeder | Prinses Charlotte, Hertogin van Valentinois |
Hy was buite Europa veral bekend vanweë sy huwelik met die Amerikaanse aktrise Grace Kelly. Hy was egter ook verantwoordelik vir hervormings aan die Monegaskiese grondwet en die uitbreiding van die land se ekonomie. Dobbelary maak vandag sowat 3 persent van die land se jaarlikse inkomste uit; toe Rainier die troon in 1949 bestyg het, was dit meer as 95 persent.
Herkoms
wysigRainier III was van Franse, Mexikaanse,[1] Spaanse, Duitse, Skotse, Engelse, Nederlandse en Italiaanse herkoms.
Deur sy oumagrootjie lady Mary Victoria Hamilton, wat vir ’n kort rukkie Prinses van Monaco was, stam hy van Jakobus IV van Skotland. Sy oer-oeroumagrootjie was Stéphanie de Beauharnais, die aangenome dogter van Napoleon Bonaparte en later die Groothertogin van Baden.
Rainier was ook ’n afstammeling van ’n hele paar ander bekendes, onder andere koning Karl IX van Swede; koning Frederick II van Denemarke en Noorweë en Ferdinand I, Heilige Romeinse Keiser.
Vroeëre lewe
wysigRainier is in Monaco gebore as die enigste seun van prins Pierre van Monaco, die Hertog van Valentinois (gebore graaf Pierre de Polignac), en sy vrou, prinses Charlotte, Hertogin van Valentinois. Sy ma was die enigste kind van prins Louis II en Marie Juliette Louvet; Louis het haar later wettig aangeneem en sy het die erfgenaam van die Monegaskiese troon geword. Rainier se pa was ’n half-Franse, half-Mexikaanse edelman van Bretagne wat sy vrou se van, Grimaldi, ná hul troue aangeneem het en deur sy skoonpa ’n prins van Monaco gemaak is.
Rainier het een suster gehad: Haar Deurlugtige Hoogheid prinses Antoinette, Barones van Massy, ’n ongewilde figuur wat glo so ingemeng het in haar kinders se plek op die lys van troonopvolgers dat prinses Grace haar gelas het om die land te verlaat.
Rainier het op 9 Mei 1949 die Soewereine Prins van Monaco geword ná die dood van prins Louis II en nadat sy ma in 1944 afstand gedoen het van haar reg op die troon.
Huwelik en familie
wysigNá ’n jaar lange hofmakery is prins Rainier op 18 April 1956 op ’n burgerlike seremonie en op 19 April op ’n kerklike seremonie getroud met die Amerikaanse aktrise en Oscar-wenner Grace Kelly. (1929–1982).[2] Hul kinders is:
- Prinses Caroline Louise Marguerite, gebore op 23 Januarie 1957 en nou Haar Koninklike Hoogheid die Prinses van Hannover en die vermoedelike troonopvolger van Monaco
- Albert II van Monaco, gebore op 14 Maart 1958
- Prinses Stéphanie Marie Elisabeth, gebore op 1 Februarie 1965
Prins Rainier het nege kleinkinders gehad:
- Andrea, Charlotte en Pierre Casiraghi – kinders van prinses Caroline en Stefano Casiraghi;
- Prinses Alexandra van Hannover – dogter van prinses Caroline en haar huidige man, Ernst August V, Prins van Hannover
- Louis en Pauline Ducruet – kinders van prinses Stéphanie en Daniel Ducruet
- Jazmin Grace Grimaldi – die buite-egtelike dogter van prins Albert II en Tamara Rotolo
- Alexandre Coste – die buite-egtelike seun van prins Albert II en Nicole Coste
- Camille Gottlieb – die buite-egtelike dogter van prinses Stéphanie.
Ná die dood van sy vrou in 1982 in ’n motorongeluk was hy romanties betrokke by sy kleinniggie, prinses Ira von Fürstenberg, ’n voormalige aktrise wat later ’n juwelierware-ontwerper geword het.
Heerser
wysigNá sy troonbestyging het Rainier hard gewerk om Monaco se beeld te verbeter nadat dit heelwat skade gely het weens finansiële nalatigheid en skandale (sy ma, prinses Charlotte, het ’n bekende juweeldief, René die Wandelstok, as minnaar gehad). Die land was feitlik bankrot en ander dobbelplekke het oopgemaak wat met Monaco meegeding het. Rainier het Monaco toe geadverteer as ’n plek om belasting vry te spring en eiendom te ontwikkel, ’n handelsentrum en ’n toerismeparadys.
Hy was ook verantwoordelik vir die prinsdom se nuwe grondwet van 1962 wat die mag van die heerser aansienlik afgeskaal het. Die veranderings het ’n einde aan outokratiese heerskappy gemaak en dit vervang met regering deur die prins en die Nasionale Raad van 18 verkose lede.
Siekte en dood
wysigIn die laaste drie jaar van sy lewe het Rainier se gesondheid erg agteruitgegaan. Vroeg in 2004 is hy in die hospitaal opgeneem weens koronêre probleme. In Oktober was hy weer in die hospitaal met ’n longinfeksie. In November van dié jaar het prins Albert op die program Larry King Live aan Larry King gesê dit gaan goed met sy pa, maar hy het brongitis.[3] Op 7 Maart 2005 is hy weer met ’n longinfeksie in die hospitaal opgeneem. Op 22 Maart is hy na die waakeenheid geskuif.
Op 31 Maart 2005 het die paleis aangekondig dat prins Albert sy pa se amptelike pligte oorneem aangesien Rainier dit nie meer kon nakom nie.[4]
Op 6 April is aangekondig dat prins Rainier op 81-jarige ouderdom oorlede is. Hy is opgevolg deur sy enigste seun, wat die troon bestyg het as prins Albert II.[5]
Rainier is op 15 April 2005 langs sy vrou in Monaco begrawe.[6]
Eksterne skakels
wysig| Wikimedia Commons bevat media in verband met Rainier III van Monaco. |
- Huis van Monaco Geargiveer 4 April 2009 op Wayback Machine
- Rainier se biografie Geargiveer 30 April 2008 op Wayback Machine van die Paleis se amptelike webtuiste
- Die koninklike paleis van Monte Carlo
- Prominente mense – Rainier III
Bron
wysig- Hierdie artikel is merendeels vertaal vanaf die Engelse Wikipedia-artikel en:Rainier III, Prince of Monaco
Verwysings
wysig- ↑ Reitwiesner, William Addams (1995). "The Lesbian ancestors of Prince Rainier of Monaco, Dr. Otto von Habsburg, Brooke Shields, and the Marquis de Sade". Besoek op 27 Februarie 2009., aangehaal: Don Ricardo Ortega y Perez Gallardo, Historia Genealogica de las Familias mas Antiguas de Mexico, Tercera-edisie, [Mexiko: Carranza, 1910]
- ↑ 1956: Prince Rainier marries Grace Kelly, BBC: On This Day. URL besoek op 31 Mei 2008.
- ↑ Interview With Prince Albert of Monaco, CNN, 18 November 2004. URL besoek op 31 Mei 2008.
- ↑ Son of ailing Prince Rainier takes over duties, MSNBC, 31 Maart 2005. URL besoek op 31 Mei 2008.
- ↑ "Monaco's Prince Rainier, 81, dies" (in Engels). BBC News. 6 April 2005. Geargiveer vanaf die oorspronklike op 14 November 2019. Besoek op 18 Augustus 2008.
- ↑ "Monaco Cathedral" (in Engels). Service Informatique du Ministère d'Etat. 28 Julie 2008. Geargiveer vanaf die oorspronklike op 23 Junie 2008. Besoek op 18 Augustus 2008.