Prinses Stéphanie van Monaco

Prinses Stéphanie
	;
Naam	Stéphanie
Volle naam	Stéphanie Marie Elisabeth
Gebore	1 Februarie 1965, Monaco
Eggenoot	Adans Lopez Peres; (getroud 2003, geskei 2004) ; Daniel Ducruet; (getroud 1995, geskei 1996)
Kinders	Louis Ducruet; Pauline Ducruet; Camille Gottlieb
Huis	Grimaldi
Vader	Rainier III
Moeder	Grace Kelly

Prinses Stéphanie van Monaco (Stéphanie Marie Elisabeth Grimaldi, Gravin van Polignac; gebore 1 Februarie 1965) is ’n lid van die Huis van Grimaldi. Sy is die jongste dogter van wyle prins Rainier III van Monaco en sy vrou, die voormalige Amerikaanse aktrise en Oscar-wenner Grace Kelly, en die suster van Albert II van Monaco en Caroline, Prinses van Hannover. Stéphanie was al ’n sangeres, swemdragontwerper en model.

Sy was ’n passasier in die motor waarin haar ma op 13 September 1982 op ’n bergpad verongeluk het. Sy kon nie prinses Grace se begrafnis bywoon nie omdat sy toe nog in die hospitaal herstel het van beserings van die ongeluk.

Verhoudings

Prinses Stéphanie was in verskeie omstrede verhoudings. Op 13 het sy ’n verhouding gehad met die Spaanse sanger Miguel Bosé en op 15 het sy betrokke geraak by Paul Belmondo, seun van die Franse rolprentster Jean-Paul Belmondo. Nog een van haar kêrels was Anthony Delon, seun van die akteur Alain Delon wat skuldig bevind is op aanklagte van motordiefstal en die besit van ’n wapen. In haar vroeë 20's was daar ’n lang verhouding met Mario Oliver Jutard. Op 25 was sy vir ’n kort rukkie verloof aan Jean Yves Lefur, wat skuldig bevind is aan bedrog en diefstal. Sy het ook ’n verhouding met die akteur Rob Lowe gehad.

In 1992 het sy ’n verhouding aangeknoop met haar lyfwag Daniel Ducruet. Twee kinders is uit die verhouding gebore:

Louis Ducruet, gebore 26 November 1992
Pauline Ducruet, gebore 4 Mei 1994

Op 1 Julie 1995 is Stéphanie en Ducruet in Monaco getroud en hul kinders is so gewettig. Die huwelik het egter nie die publikasie oorleef van foto's waar Ducruet met die kaalborsmodel Muriel Houtteman kafoefel nie. Daarna het Stéphanie ’n paar kort verhoudings gehad met onder andere die sportman Fabien Barthez en die akteur Jean-Claude Van Damme. Sestien maande ná haar egskeiding is sy romaties verbind aan Jean Raymond Gottlieb, ’n voormalige gendarme en ski-instrukteur van Parys wat haar sekuriteitshoof geword het.

Op 15 Julie 1998 het sy die lewe geskenk aan hul kind, Camille Marie Kelly Grimaldi, of Gottlieb, in die Centre Hospitalier Princesse Grace in Monte Carlo. Gottlieb is egter nooit in die openbaar as die pa erken nie omdat die prinses geweier het om die pa se naam op die geboortesertifikaat te sit.

In 2000 het sy ’n verhouding aangeknoop met ’n Switserse sirkuseienaar en olifantafrigter, Franco Knie. Die verhouding het in 2001 bekend geword nadat Knie aangekondig het dat hy sy vrou, Claudine, vir Stéphanie gaan verlaat. Die prinses het verskeie maande lank saam met die sirkus deur Europa getoer terwyl sy en haar kinders in sy karavaan gewoon het. Stephanie en Knie se paaie het in 2002 geskei en daarna was daar berigte van ’n verhouding tussen Stéphanie en haar pa se butler, Richard Lucas, ’n getroude pa van twee. In 2003 is sy verbind aan die paleis se hooftuinier en vir ’n kort rukkie aan Philippe Junot, haar suster se eerste man.

Op 12 September 2003 is sy na bewering getroud met Adans Lopez Peres, ’n Portugees-Spaanse sweefstokarties wat 10 jaar jonger as sy is. Hulle is op 24 November 2004 geskei en het geen kinders gehad nie.

Eksterne skakels

IMDB
Huis van Monaco Geargiveer 4 April 2009 op Wayback Machine

Bron

Hierdie artikel is merendeels vertaal vanaf die Engelse Wikipedia-artikel en:Princess Stéphanie of Monaco