Caroline, Prinses van Hannover
Caroline, Prinses van Hannover (Caroline Louise Marguerite Grimaldi, gebore 23 Januarie 1957) is die oudste kind van wyle prins Rainier III van Monaco en sy vrou, die voormalige Amerikaanse aktrise en Oscar-wenner Grace Kelly.
| Caroline | |
|---|---|
| Prinses van Hannover | |
 Prinses Caroline in 2009
| |
| Naam | Caroline |
| Volle naam | Caroline Louise Marguerite |
| Titels | Prinses van Hannover |
| Suster van | Albert II van Monaco |
| Gebore | 23 Januarie 1957, Monaco |
| Eggenoot | Ernst August, Prins van Hannover (getroud 1999) Stefano Casiraghi (getroud 1983, oorlede 1990) Philippe Junot (getroud 1978, geskei 1980) |
| Kinders | Andrea Casiraghi Charlotte Casiraghi Pierre Casiraghi Prinses Alexandra van Hannover |
| Huis | Hannover, Grimaldi |
| Vader | Rainier III |
| Moeder | Grace Kelly |
Sy is gebore as prinses Caroline van Monaco van die Huis van Grimaldi en is sedert 1999 die tweede vrou van Ernst August, Prins van Hannover. Sedert haar pa se dood op 6 April 2005 was sy ook die vermoedelike opvolger van haar broer, Albert II van Monaco, totdat daar op 10 Desember 2014 'n seun vir hom gebore is. Sy het ook ’n jonger suster, Stéphanie.
Skoolloopbaan
wysigDie prinses het haar matriek in 1974 met lof in die A-vlak geslaag. Sy het skoolgegaan aan die St. Mary's School Ascot en het haar studies aan die Sorbonne in Paris voortgesit, waar sy ’n diploma in filosofie gekry het. Sy kan Frans, Engels, Spaans, Duits en Italiaans vlot praat.
Eerste huwelik
wysigPrinses Caroline se eerste man was Philippe Junot (gebore 19 April 1940), ’n Paryse bankier. Hulle is op 28 Junie 1978 op ’n burgerlike seremonie en op 29 Junie op ’n kerklike seremonie getroud. Hulle het nie kinders gehad nie en is op 9 Oktober 1980 geskei. Caroline se ma was teen die huwelik gekant en het voorspel dat dit nie lank gaan hou nie. Sy het gevoel hy is te oud en ’n pierewaaier. In 1992 het die Rooms-Katolieke Kerk die huwelik nietig verklaar.
Caroline was voor haar tweede huwelik vir ’n kort rukkie verloof aan Robertino Rossellini, seun van Roberto Rossellini.
Tweede huwelik
wysigHaar tweede man was Stefano Casiraghi (8 September 1960 – 3 Oktober 1990), die sportman-erfgenaam van ’n Italiaanse nywerheidsfortuin. Hulle is op 29 Desember 1983 in Monaco getroud en het drie kinders:
- Andrea Albert Pierre Casiraghi, gebore 8 Junie 1984
- Charlotte Marie Pomeline Casiraghi, gebore 3 Augustus 1986
- Pierre Rainier Stefano Casiraghi, gebore 5 September 1987
Stefano is in 1990 op 30-jarige ouderdom in ’n snelbootongeluk dood.
Derde huwelik
wysigHaar derde en huidige man is Ernst August, Prins van Hannover, die hoof van die Huis van Hannover. Hulle is op 23 Januarie 1999 in ’n burgerlike seremonie in Monaco en op 27 Januarie op ’n kerklike seremonie in Marienburg getroud nadat hy in September 1997 geskei het van Chantal Hochuli, voorheen ’n vriendin van Caroline.[1] Hulle het saam een dogter:
- Prinses Alexandra van Hannover, gebore op 20 Julie 1999 in Vöcklabruck, Oostenryk.
Haar man se familietitels is, nes ander koninklike en adellike titels, ná die Eerste Wêreldoorlog nie deur die Weimar-republiek en daarna deur Duitsland erken nie. Daarby bestaan die Koninkryk van Hannover nie meer sedert dit tydens die Oostenryks-Pruisiese Oorlog van 1866 deur die Koninkryk van Pruise geannekseer is nie. Haar man mag egter kragtens Duitse wetgewing "Prins van Hannover" as sy van gebruik (dus Ernst August Prins van Hannover). Caroline mag ook die van "Prinses van Hannover" gebruik, maar nie as ’n titel nie.
Beide Frankryk en koningin Elizabeth van Brittanje moes hul toestemming vir die huwelik gee.[2]
Ernst August was al verskeie kere weens omstrede redes in die nuus. Hy het onder meer ’n fotograaf geslaan, en is twee keer gefotografeer terwyl hy in die openbaar urineer. Op 3 April 2005 is hy in die hospitaal opgeneem met akute pankreatitis. Die volgende dag, net twee dae voor die dood van prins Rainier het hy vir ’n paar dae in ’n koma verval.
Sedert September 2009 word in die Engelse en Franse pers berig dat hy en prinses Caroline nie meer saambly nie.[3]
Opvolging
wysigPrinses Caroline was die vermoedelike troonopvolger van Monaco omdat haar broer, Albert II van Monaco, tot op 10 Desember 2014 geen wettige kinders gehad het nie.
Voor 2002 het Monaco se grondwet bepaal dat net die "direkte en wettige manlike" kinders van die "laaste" regerende prins die troon mag bestyg.[4] Op 2 April 2002 het Monaco ’n wet afgekondig waarin voorsiening gemaak word dat die troon na ’n regerende prins se broers en susters en hul kinders van albei geslagte mag gaan as hy sonder wettige kinders sterf.[5] In Oktober 2005, toe Albert die troon bestyg, het die wet van krag geword toe dit deur Frankryk bekragtig is in ooreenstemming met die 2002-verdrag oor betrekkinge tussen dié twee lande. Sy susters en hul wettige kinders het dus nou die reg om hom op te volg.
Daar is ’n presedent in Monaco waar ’n prins sy eie buite-egtelike kind aangeneem het en dié so ’n wettige erfgenaam gemaak het, soos die geval was met Caroline se ouma, prinses Charlotte, Hertogin van Valentinois.[6] Sedert ’n verandering aan die grondwet in 2002 is dit egter nie meer moontlik nie.[5]
Prins Albert is op 2 Julie 2011 getroud met die voormalige Suid-Afrikaanse Olimpiese swemmer Charlene Wittstock. Hulle het 'n tweeling ryker geword op 10 Desember 2014.
Bron
wysig- Hierdie artikel is merendeels vertaal vanaf die Engelse Wikipedia-artikel en:Caroline, Princess of Hanover
Verwysings
wysig- ↑ Hubbard, Kim (8 Februarie 1999), "Ernst Goes to Monaco", People 51 (5), archived from the original on 4 Junie 2009, https://web.archive.org/web/20090604044828/http://www.people.com/people/archive/article/0,,20127529,00.html, besoek op 29 Mei 2009
- ↑ "Monaco: Die Verdrae van 1861 en 1918". Heraldica.org (in Frans). François Velde. 22 Maart 2006. Geargiveer vanaf die oorspronklike op 30 April 2019. Besoek op 14 Januarie 2009.
Measures concerning the international relations of the Principality shall always be the subject of prior consultations between the Government of the Principality and the French Government. The same shall apply to measures concerning directly or indirectly the exercise of a regency or succession to the throne, which shall, whether by marriage or adoption or otherwise, pass only to a person who is of French or Monegasque nationality and is approved by the French Government.
- ↑ Allen, Peter Princess Caroline 'to divorce' third husband reigniting fears of Monaco royal curse Daily Mail 12 September 2009
- ↑ "Status of Monaco" (in Engels). Geargiveer vanaf die oorspronklike op 30 April 2019. Besoek op 20 Junie 2007.
- ↑ 5,0 5,1 "The Constitution (2002)" (in Engels). Geargiveer vanaf die oorspronklike op 30 April 2019. Besoek op 20 Junie 2007.
- ↑ "Monaco: Die Opvolgingskrisis van 1918". Heraldica.org (in Frans). François Velde. 22 Maart 2006. Geargiveer vanaf die oorspronklike op 30 April 2019. Besoek op 14 Januarie 2009.