Rekenaargesteunde ontwerp

Rekenaargesteunde ontwerp (RGO) is die gebruik van 'n wye verskeidenheid rekenaargebaseerde hulpmiddelle om ingenieurs, argitekte en ander professionele ontwerpers te steun in hul ontwerpaktiwiteite. Dit is die hoof meetkundige hulpmiddel tydens bestuur van 'n produk se lewenssiklus en behels programmatuur en soms spesiale hardeware. Bestaande pakkette wissel van 2 dimensionele vektorgebaseerde tekenstelsels tot 3 dimensionele parametriese oppervlaktes en ruimtemeetkundige modellering.

Rekenaargesteunde ontwerp vir 'n krukas.

Inleiding

Rekenaargesteunde ontwerp word gebruik om produkte te ontwikkel wat kan bestaan uit goedere wat deur verbruikers gebruik word of goedere wat gebruik word in die vervaardiging van ander produkte. Rekenaargesteunde ontwerp word ook gebruik in die ontwerp van gereedskap en masjinerie wat gebruik word in die vervaardiging van ander komponente. RGO word ook gebruik tydens die tegniese tekening en ontwerp van alle soorte geboue, vanaf klein wooneenhede tot die grootste kommersiële en nywerheidsgeboue (hospitale en fabrieke).

RGO word regdeur die ingenieurswese proses vanaf konsepontwerp, uitleg en die gedetailleerde ingenieursanalise van komponente tot en met die beskrywing van die vervaardigingsmetodes ingespan.

Gebruiksvelde

• Argitektuur, Nywerheidsontwerp, Ingenieurswese, Tuinbou en Konstruksie
• Bou-ingenieurswese
• Meganiese rekenaargesteunde ontwerp (Engels MCAD)
  • Voertuigontwerp
  • Lugvaartkundige ontwerp
  • Verbruikersgoedere
  • Masjinerie
  • Skeepsbou
• Elektroniese en elektriese rekenaargesteunde ontwerp (Engels ECAD)
• Beplanning van vervaardigingsprosesse
• Digitale stroombaanontwerp
• Tekstiel- en kledingbedrywe

Argitektuur

Programmatuur kan resultate in 'n verskeidenheid formate lewer, maar tipies word 'n grafies gebaseerde resultaat gelewer wat dan gebruik kan word om sketse vir goedkeuring van 'n konsep te lewer en dan ook uiteindelik die uiteindelike werkstekeninge. 'n Voorbeeld sou 'n strukturele ontwerpspakket wees wat gebruik word om die integriteit van 'n staalraamgebou te ondersoek deur die nodige berekeninge te doen om die grootte, sterkte en plasing van komponente te bepaal en die impak van eksterne faktore soos windbelading te evalueer. Die uitset wat gelewer word vanaf so 'n pakket is dikwels 'n lys van materiaalbenodighede en sketse wat deur 'n tegniese tekenpakket verfyn kan word vir die lewer van konstruksietekeninge.

Rekenaargesteunde tekeninge, verwys normaalweg na die tegniese tekeningkomponent van die projek, waar 'n rekenaar die tradisionele tekenbord vervang. Die inset tot hierdie deel van die ontwerpproses kan die vorm aanneem van gespesialiseerde berekeningspakkette, reeds bestaande tekeninge van komponente, grafiese beelde soos kaarte, foto's en ander media of soms selfs handsketse deur die ontwerper self. Die persoon wat dan die RGO-sagteware bestuur se taak is dan om die insette saam te voeg om tekeninge en spesifikasies te lewer wat op hul beurt weer gebruik kan word om 'n raming te maak van materiaalhoeveelhede benodig en totale projekkoste en dan ook die uiteindelike gedetailleerde tekeninge op te stel om die struktuur te bou.

Die spektrum van argitektoniese en ingenieursprojekte waar rekenaargesteunde tekenwerk betrokke is, is wyd uiteenlopend en sluit in argitektoniese-, meganiese-, elektriese-, strukturele-, hidroliese-, binnenshuise ontwerp-, tuinbou- en siviele konstruksieprojekte in. Rekenaargesteunde ontwerpprogrammatuur kan ook gebruik word om insette te lewer tot die ander vorme van ontwerpkommunikasie soos 3D visualisering, modelbou, animasievoorstellings om maar 'n paar te noem.

Rekenaargesteunde tekenprogrammatuur is ook 'n basiese hulpmiddel in ander dissiplines wat verwant is aan argitektuur, byvoorbeeld in Siviele ingenieurswese, by landskapsargitektuur, in padbou, dreineringstelselsontwerp, in kartografie, die opstel van landmetertekeninge vir die beskrywing van grondplanne vir wetlike doeleindes en so meer.