Ryan Gosling

Ryan Thomas Gosling (gebore op 12 November 1980 in London, Ontario) is ’n Kanadese akteur en musikant wat by Hollywood se A-lys van akteurs gereken word.

Ryan Gosling
Ryan Gosling in 2018 tydens die première van First Man in die Smithsonian National Air and Space Museum in Washington, DC
Geboortenaam	Ryan Thomas Gosling
Geboorte	12 November 1980 (1980-11-12)
Ouers	Thomas en Donna Gosling
Lewensmaat	Eva Mendes
Kinders	Twee dogters
Aktiewe jare	1993-tans

Loopbaan

Ryan Gosling se ouers was praktiserende lede van die Kerk van Jesus Christus van die Heiliges van die Laaste Dae. Gosling het die geloof, waarin hy grootgemaak is, self nie aanvaar nie. Hy het sy loopbaan as ’n kinderster op die Disney-televisiekanaal se Mickey Mouse Club (1993–'95) gemaak. Daarna het hy in ander gesinsvermaakprogramme opgetree soos Are You Afraid of the Dark? (1995) en Goosebumps (1996). Hy was ook in die TV-reekse Breaker High (1997–'98) as Sean Hanlon en Young Hercules (1998–'99) in die titelrol. Sy eerste rolprentrol was as ’n Joodse neo-Nazi in The Believer (2001) en hy het daarna naam gemaak in onafhanklike flieks soos Murder by Numbers (2002), The Slaughter Rule (2002) en The United States of Leland (2003).

Gosling het in 2004 wyer bekend geraak met sy hoofrol in die romantiese drama The Notebook, waarvoor hy vier Teen Choice-toekennings en ’n MTV Movie-prys ontvang het. Sy rol as ’n dwelmverslaafde onderwyser in Half Nelson (2006) is benoem vir ’n Oscar en sy rol as ’n sosiaal wanaangepaste alleenloper in Lars and the Real Girl (2007) is benoem vir ’n Golden Globe. In 2007 was hy ook in die hofriller Fracture.

Ná ’n blaaskans van drie jaar was Gosling in Blue Valentine te sien en hy het ’n tweede Golden Globe-benoeming gekry. 2011 was ’n mylpaal vir hom – hy het in drie hoofstroomflieks gespeel: die romantiese komediedrama Crazy, Stupid, Love, die politieke drama The Ides of March en die aksieriller Drive. Hy het twee Golden Globe-benoemings daarvoor gekry. In 2013 was hy in die misdaadriller Gangster Squad, die drama The Place Beyond the Pines en die geweldfliek Only God Forgives. Sy regisseursdebuut, Lost River, is in 2014 uitgereik. In 2015 was hy in die drama The Big Short te sien. Vir sy hoofrol in die musiekblyspel La La Land (2016) het hy die Golden Globe as beste akteur in die kategorie musiekblyspel of komedie ontvang.

Musikant en sakeman

Gosling se musiekgroep, Dead Man's Bones, het hul debuutalbum met dieselfde naam in 2009 uitgereik en het in dié jaar deur Noord-Amerika getoer. Hy is die mede-eienaar van Tagine, ’n Marokkaanse restaurant in Beverly Hills, Kalifornië.