Samson Rickard Stuttaford
Samson Rickard Stuttaford (Engeland, Julie 1833–1915) was 'n Suid-Afrikaanse afdelingswinkeleienaar en 'n stigter van die afdelingswinkels Stuttafords.
Hy het na die Kaap toe geëmigreer nadat hy sy opleiding in die handel in Londen gekry het. In die onderneming van A.W. Fletcher ontmoet hy sy lewenslange vennoot, sir William Thorne, en stig in 1857 Plymouth House, wat kort daarna Thorne, Stuttaford & Co. geword het. Die onderneming verhuis in 1871 na Adderleystraat (waar dit meer as 120 jaar sou bly) en rig later takke op in Johannesburg (1892) en Durban (1924). Teen 2011 het Stuttafords 15 winkels gehad: Sandown, Roodepoort, Eastgate, Rosebank (Johannesburg), Cresta, Menlyn Park (Pretoria), Brooklyn (Pretoria), Canal Walk, Claremont, Tygervallei, Umhlanga Rocks, La Lucia, Westville (Durban), Windhoek en Gaborone, maar in Junie 2017 is die winkelgroep gelikwideer.
Stuttaford se seun, Richard, het twee jaar ná sy pa se dood hoof van die maatskappy geword. Hy was ook minister sonder portefeulje van 1933 tot 1936, van 1936 tot 1939 minister van volkswelsyn en van 1939 tot 1942 van handel en nywerhede in genl. Jan Smuts se oorlogskabinet.
Bronne
wysig- Rosenthal, Eric. 1978. Encyclopaedia of Southern Africa. Cape Town and Johannesburg: Juta and Company Limited.
- Stuttafords se webtuiste