S.W. Liebenberg

S.W. Liebenberg (1905–1968) was ’n Afrikaanse dramaturg en skrywer van godsdienstige jeugliteratuur.

Lewe en werk

Schalk Willem Jacobus Liebenberg is op 19 Maart 1905 op Piketberg in die Kaapprovinsie gebore. Hier ontvang hy ook die grootste gedeelte van sy skoolopleiding. Na ’n tydjie op Stellenbosch vertrek hy aan die einde van 1925 na Edinburgh in Skotland om hom voor te berei vir evangelisasiewerk. Vanaf 1927 tot aan die einde van 1935 doen hy meesal onder die jeug evangelisasiewerk in Ierland, Skotland en daarna in Suid-Afrika. In hierdie tyd besoek hy vir drie jaar lank skole vir die Christen-Studentevereniging en die Children’s Special Mission. Vanaf 1936 tot aan die einde van 1938 is hy in diens van die Departement van Arbeid en Volkswelsyn as Welsynsbeampte en aanvaar daarna die pos as hoof van ’n jeugdige misdadiger-inrigting.

Aan die begin van 1940 word hy takbestuurder van die Christen Studentevereniging (CSV) se boekwinkel in Johannesburg. In 1944 word hy bevorder tot Hoofbestuurder van die CSV-Boekhandel met kantore op Stellenbosch. Hy verteenwoordig die CSV in 1946 op die Algemene Vergadering van die Wêreld Federasie van Christen Studente te Genève in Switserland en maak van die geleentheid gebruik om soveel moontlik Europese lande te besoek om navorsing te doen oor die uitgewersbedryf. In 1947 onderneem hy weer ’n oorsese reis, hierdie keer na die Verenigde State van Amerika en Kanada. Met die totstandkoming van die CSV-Maatskappy in Suid-Afrika in 1947 word hy aangestel as Besturende Direkteur van al die groep se sake-ondernemings, wat insluit die boekwinkels, die uitgewery, losieshuise, die restaurant en eiendomme. Daarna word hy in 1947 ook tegelykertyd Besturende Direkteur van Universiteits-uitgewers en Boekhandelaars (Edms.) Bpk., waarvan hy in 1949 al die belange oorneem. Hy word ook aangestel as voorsitter van die Stellenbosse Kamer van Koophandel en dien op die Vereniging van Boekhandelaars van die Kaap die Goeie Hoop. Later word hy aangewys as voorsitter van die Vereniging van Suid-Afrikaanse Uitgewers. In 1929 trou hy met Henrietta Christien Smith (28 Desember 1907 – 27 Januarie 2000)en die egpaar het drie seuns en ’n dogter, maar een van die seuns is vroeg oorlede. Schalk is op 20 Junie 1968 oorlede

Skryfwerk

In samewerking met A.J. Hanekom skryf hy ’n drama oor “Gideon Scheepers”. Verder skryf hy onder die naam Skalk Liebenberg ’n groot aantal godsdienstige boekies vir kinders (insluitende “Aanhou wen”, “Die dromer en ander Bybelverhale” en “Kaptein van sy skool”) asook Bybelstudiereekse vir skole. “Onder ’n vraagteken” is ’n roman wat vertel oor die lewe in die agterbuurtes van Kaapstad.

Publikasies

Jaar	Publikasies
1931	Aanhou wen
	Onder ’n vraagteken
1938	Kaptein van sy skool
1939	Gideon Scheepers (in samewerking met A.J. Hanekom)
1942	Die dromer en ander Bybelverhale
1944	Oorwinnende genade

Bronnelys

Boeke

• Dekker, G. “Afrikaanse Literatuurgeskiedenis” Nasou Beperk Kaapstad Elfde druk 1970
• Kannemeyer, J.C. “Geskiedenis van die Afrikaanse literatuur 1” Academica, Pretoria en Kaapstad Tweede druk 1984

• Nienaber, P.J. et al “Perspektief en Profiel” Afrikaanse Pers-Boekhandel Johannesburg Derde hersiene uitgawe 1969
• Van Coller, H.P. (red.) “Perspektief en Profiel Deel I” J.L. van Schaik-Uitgewers Pretoria Eerste uitgawe 1998

Internet

• Eggsa: http://www.eggsa.org/library/main.php?g2_itemId=564712
• Geni: https://www.geni.com/people/Schalk-Liebenberg/6000000013013381482
• Wikitree: https://www.geni.com/people/Schalk-Liebenberg/6000000013013381482
• Ongepubliseerde dokumente
• Liebenberg, S.W. Lewenskets Nasionale Afrikaanse Letterkundige Museum en Navorsingsentrum (NALN) Bloemfontein