Schoonspruitoog

Die Oog van Schoonspruit by Ventersdorp is een van Suid-Afrika se sterkste fonteine.

Hierdie natuurlike bron van grondwater lê net noordoos van Ventersdorp, langs die R30-pad, by die koördinate 26°17′S 26°51′O en 1 489 m bo seevlak. Die Voortrekkers was reeds in 1850 bewus van hierdie bron.

Die fontein handhaaf dwarsdeur die jaar 'n redelike konstante vloei. Dit lewer ten minste 70 000 m³ water van goeie gehalte per etmaal. Maar indien dit in die opvangsgebied goed reën, kan die uitloop tydelik meer as verdubbel. 'n Netwerk van kanale lei die water na plase in die omgewing. Ventersdorp se munisipaliteit het 'n waterreg van 400 m³ per uur. Die res vloei weg in die Schoonspruit.

Hierdie water is afkomstig uit die Schoonspruit dolomitiese kompartement. Die belangrikste bron van grondwater in Suid-Afrika is die dolomiet-series, d.w.s. klip met 'n baie hoë kalkinhoud, wat geoloë die Transvaalstelsel noem. Dit beslaan 'n area van 14 000 km².

Lees ook

• Albionbron
• Gerhardminnebron
• Oog van Kuruman
• Zuurbekom

Bibliografie

• De Villiers, J.P.: 'n Evaluering van die effektiwiteit van die Schoonspruitbesproeiingskema. Noordwes-universiteit: ongepubliseerde M.Sc.-verhandeling, 2007.
• scholar.ufs.ac.za