Siku Quanshu

Die Siku Quanshu is die grootste versameling boeke in die Chinese geskiedenis. Dit word vertaal as Volledige Biblioteek in Vier Seksies, Keiserlike Versameling van Vier, Keiser se Vier Skatte of Volledige Biblioteek van die Vier Skatte.

Siku Quanshu
Name (taalvariante)
Tradisionele Chinees	四庫全書
Vereenvoudigde Chinees	四库全书
Pinyin	Sìkù Quánshū
Wade-Giles	Ssu-k'u Ch'üan-shu

Geskiedenis

Op die hoogtepunt van die Qing-dinastie in die 18de eeu het keiser Qianlong die Siku Quanshu laat skryf om te wys die Qing-dinastie kan die Ming-dinastie se Yongle-ensiklopedie van 1403 oortref; laasgenoemde was toe die wêreld se grootste ensiklopedie.

Die redaksie het 361 geleerdes ingesluit, met Ji Yun en Lu Xixiong as die hoofredakteurs. Hulle het in 1773 met die samestelling begin en dit in 1782 voltooi. Die redakteurs het meer as 10 000 manuskripte uit die keiserlike versamelings en ander biblioteke bymekaargemaak en aangeteken, sowat 3 000 werke vernietig wat as anti-Mantsjoe beskou is en 3 461 werke gekies vir insluiting in die Siku Quanshu. Die werk is in 36 381 volumes gebind en het meer as 79 000 hoofstukke. Dit beslaan sowat 2,3 miljoen bladsye en het sowat 800 miljoen Chinese karakters.

Skribas het elke woord met die hand gekopieer. Volgens Wilkinson (2000: 274), is die "skribas (waarvan daar 3 826 was) nie in kontant betaal nie, maar beloon met amptelike poste nadat hulle ’n sekere getal woorde in ’n sekere tyd voltooi het". Vier eksemplare vir die keiser is in spesiaal geboude biblioteke in die Verbode Stad, Ou Somerpaleis, Shenyang en Chengde geplaas. Nog drie eksemplare vir die publiek is in Siku Quanshu-biblioteke in Hangzhou, Zhenjiang en Yangzhou gehou.

Die Siku Quanshu-eksemplare in Zhenjiang en Yangzhou is tydens die Taiping-rebellie vernietig. In 1860, tydens die Tweede Opiumoorlog, het ’n Anglo-Franse mag die grootste deel an die eksemplaar in die Ou Somerpaleis verbrand. Die oorblywende vier eksemplare het tydens die Tweede Chinees-Japannese Oorlog skade opgedoen. Dié vier eksemplare word gehou in die Nasionale Biblioteek van China in Beijing, die Nasionale Paleismuseum in Taipei, die Gansu-biblioteek in Lanzhou en die Zhejiang-biblioteek in Hangzhou.

Inhoud

’n Bladsy uit die Siku Quanshu.

Die versameling word in vier verdeel volgens die verdelings van die keiserlike biblioteek.

• Jīng (经, "Klassieke Werk") – Chinese klassieke tekste
• Shǐ (史, "Geskiedenisse") – geskiedenis en geografie
• Zĭ (子, "Meesters") – filosofie, kunste en wetenskappe
• Jí (集, "Versamelings") – ’n keur uit die Chinese letterkunde

Dit sluit die meeste groot Chinese tekste in, van die antieke Zhou-dinastie tot die Qing-dinastie, en dek alle akademiese terreine.

Grootte

In haar boek Too Much To Know bespreek die historikus Ann M. Blair die grootte van die versameling:

"Die Siku Quanshu bestaan uit 79 000 hoofstukke in 36 000 volumes en sewe eksemplare is tussen 1773 en 1782 gemaak (deur meer as 3 800 skribas); hiervan het een eksemplaar ongeskonde behoue gebly in die Verbode Stad, en in die 1980's is ’n fotolitografiese afskrif daarvan gemaak wat nou aanlyn beskikbaar is. Teen 800 miljoen woorde is dit eers onlangs deur die Engelse Wikipedia (meer as 1 miljard woorde in Junie 2010) verbygesteek, maar in die 18de eeu was dit veel groter as die 40 miljoen woorde in die 15de uitgawe van die Encyclopædia Britannica."

Hoofbronne

• Guy, R. Kent, The Emperor's Four Treasuries: Scholars and the State in the Late Ch'ien-lung Era. Cambridge (Mass.): Harvard University Press, 1987 (Harvard East Asian Monographs 129), ISBN 0-674-25115-6.
• Hong, William. "Preface to an Index to Ssu-k'u ch'üan-shu tsung-mu en Wei-shou shu-mu", in: Harvard Journal of Asiatic Studies, 4 (1939): pp. 47–58.
• Wilkinson, Endymion, Chinese History. A Manual, Cambridge (Mass.): Harvard University Press, 2000 (Harvard-Yenching Institute Monograph Series, 52), ISBN 0-674-00247-4, pp. 273–277.
• Yue, P.Y. Title Index to the Si ku chuan shu, Beiping (Standard Press) 1934.
• Crossley, Pamela. A Translucent Mirror: History and Identity in Qing Imperial Ideology, Berkeley: University of California Press, 1999, ISBN 0-520-21566-4 (or ISBN 978-0-520-23424-6)
• The Cambridge History of China by Fairbank on Literary inquisition

Bykomende bronne

• (zh) 評述清代編纂《四庫全書》的功過。 Geargiveer 18 September 2018 op Wayback Machine
• (zh) 清朝實亡于乾隆 Geargiveer 19 September 2018 op Wayback Machine
• (zh) 四库全书 金山词霸 Geargiveer 25 Januarie 2013 op Wayback Machine
• (zh) 《四库全书》与《续修四库全书》 顾关元 Geargiveer 18 Desember 2018 op Wayback Machine
• (zh) 《四库全书》——文字狱之最！袁岂凡^{[dooie skakel]}
• (zh) 炮轟《四庫全書》和紀曉嵐有何不可？ Geargiveer 19 Julie 2011 op Wayback Machine
• (zh) 乾隆編"四庫全書"為引蛇出洞燒異說？
• (zh) 四库禁书部分目录

Eksterne skakels

• Siku Quanshu geskandeerde teks (zh)
• Siku Quanshu by World Digital Library
• Ssu-k'u ch'uan-shu (Volledige Biblioteek van die Vier Skatte) Geargiveer 28 Maart 2018 op Wayback Machine, Nasionale Paleismuseum
• Destruction Of Chinese Books In The Peking Siege Of 1900 deur Donald G. Davis jr. van die Universiteit van Texas by Austin en Cheng Huanwen van die Zhongshan-universiteit
• Wikimedia Commons het meer media in die kategorie Siku Quanshu.
• Hierdie artikel is vertaal uit die Engelse Wikipedia