Andreas (apostel)
Sint Andreas (Grieks: Ανδρέας, Andreas, "die manlike, die moedige") was 'n volgeling van Johannes die Doper en later, soos sy broer Simon Petrus, een van die twaalf apostels van Jesus van Nasaret.[1] Hy word as die stigter en eerste biskop van die Kerk van Bisantium beskou en word daarom as beskermheilige van die Ekumeniese patriargie van Konstantinopel gesien.
| Sint Andreas | |
|---|---|
 Sint Andreas, deur Artus Wolffort | |
| Heilige | |
| Gebore | 6 v.C., Galilea, Romeinse Ryk |
| Sterfte | 60, Patras, Achaia, Romeinse Ryk |
| Vereer in | Die hele Christendom |
| Feesdag | Sint Andreasdag (30 November) |
| Attribute | Ou man met lang wit hare en baard, hou die Evangelie, soms leun op 'n skuinskruis, visnet |
| Beskermheilige | Skotland, Barbados, Oekraïne, Rusland, Sisilië, Griekeland, Siprus, Roemenië, Patras, San Andrés (Tenerife), bisdom van Parañaque, Manila, Amalfi, Luqa (Malta) en Pruise; bisdom van Victoria; vissers, vishandelaars en tou-makers, tekstielwerkers, sangers, mynwerkers, swanger vroue, slagters, plaaswerkers, beskerming teen keelseer, beskerming teen stuiptrekkings, beskerming teen koors, beskerming teen kinkhoes |
Andreas het sy broer, Simon Petrus, na Jesus gelei.[1] Tog word Petrus se naam in die Bybel deurentyd eerste gelys (as die twaalf apostels genoem word). Andreas se naam word in Evangelie volgens Matteus en Evangelie volgens Lukas 2de geplaas, en in Evangelie volgens Markus en Handelinge 4de.
Andreas is in Griekeland aan 'n X-vormige kruis gekruisig. Nadat hy deur sewe soldate met 'n sweep gegesel is, het hulle sy liggaam aan die kruis gebind om sy lyding te verleng. Sy volgelinge het gesê dat hy die volgende woorde geuiter het toe hy na die kluis gelei is: "Ek het lank verlang en uitgesien na hierdie vreugdevolle oomblik. Die kruis was geheilig deur die liggaam van Christus wat daaraan gehang het." Hy het twee dae lank vir sy folteraars gepreek voordat hy gesterf het.
Sint Andreas is die beskermheilige van Skotland. Die vlag van Sint Andreas (met 'n "X" daarop) is die amptelike vlag van Skotland. Sint Andreasdag, die Skotse nasionale dag, word op 30 November gevier.[2] Hy is ook die beskermheilige van verskeie ander lande, onder andere Barbados, Oekraïne, Rusland, Sisilië, Griekeland, Siprus en Roemenië.
Verwysings
wysig- ↑ 1,0 1,1 Johannes 1:41: "Andréas, die broer van Simon Petrus, was een van die twee wat dit van Johannes gehoor en Hom gevolg het. (1:42) Hy het eers sy eie broer Simon gekry en vir hom gesê: Ons het die Messías gevind."
- ↑ HAT Taal-en-feitegids, Pearson, Desember 2013, ISBN 978-1-77578-243-8
Eksterne skakels
wysig
Wikimedia Commons het meer media in die kategorie Andreas (apostel).
