Anna Böeseken: Verskil tussen weergawes

Anna Jacoba Böeseken is in Pretoria gebore as enigste kind van die Nederlandse immigrante-egpaar Adriaan Cornelis Böeseken en Jantina Eelbrindina de Cock. Sy is op 28 Junie 1997 in die ouderdom van 91 jaar in [[Oranjezicht]] in [[Kaapstad]] oorlede. Böeseken groei op in die Vrystaat en was onderwyseres op [[Prins Albert]] en die [[Paarl]]. Daarna studeer sy verder en behaal die MA-graad in Geskiedenis. In 1941 doen sy navorsing in die Landsargief in die destydse [[Batavia]] wat daartoe lei dat sy promoveer onder prof. [[Hendrik Bernardus Thom|H.B. Thom]] aan die [[Universiteit van Stellenbosch]] met die proefskrif getiteld ''Die Nederlandse kommissarisse en die 18de eeuse samelewing aan die Kaap''.

Vanaf 1943 tot 1955 was sy joernalis by [[Nasionale Pers]]. In 1955 tree sy in diens by die Staatsargief en begin met die transkribering van die Resolusies van die Politieke Raad. In 1961 word sy die hoofredakteur van bronnepublikasies. Deur hierdie werk het sy die grootste Suid-Afrikaanse kenner van die dialekte van die 17de en 18de eeuse Nederlands en handskrifte (dikwels nog in die Gotiese skryfstyl) geword. Weens haar ervaring as joernalis skryf sy in ‘n besonder leser-vriendelike styl. Sy is die redakteur van ‘n groot aantal bonnepublikasies en skrywer van ‘n aantal populêre historiese werke. Tot ander werke lewer sy bydraes of tree op as redakteur. Haar gepubliseerde doktorstesis handel oor die sosiososiaal-ekonomiese aspekte wat die destydse politieke situasie in ‘n nuwe lig stel. In ''Simon van der Stel en sy kinders'' skets sy die era waarin Simon en Wilhem Adriaan van der Stel geleef het.