Garies

Garies is 'n klein dorpie in Namakwaland aan die voet van die Kamiesberg, sowat 46 km suid van Kamieskroon en 146 km noordwes van Vanrhynsdorp. Die dorp het een hotel en een brandstofvulstasie asook 'n gekombineerde skool en 'n laerskool in die buurt Mooi-uitsig. Dit is die dienssentrum van 'n welvarende skaapboerderygebied. Die NG gemeente is in 1904 van die Moedergemeente Namakwaland afgestig. Die dorp het bekendheid verwerf weens die sakebedrywighede van sy bekendste inwoner, Adriaan Nieuwoudt. Die bevolking is tans sowat 1 500. Die naam is afkomstig van 'n Khoi-wooord wat "kweekgras" beteken.