Hoewel dit met die geleidelike, (verdere)voortgesette verengelsing van die suidelike voorstede van [[Kaapstad]] vandag moeilik denkbaar is, het die Laerskool Nassau sy ontstaan te danke gehad aan die verafrikaansing van die omgewing in die laat jare twintig en vroeë jare dertig van die vorige eeu. Die grootskaalse verhuising van Afrikaners na voorstede soos [[Soutrivier]], [[Woodstock]], [[Observatory]] en [[Maitland]] was 'n regstreekse gevolg van die [[Armblankevraagstuk]], toe duisende mense na die stede gestroom het op soek na werk in die ontluikende fabrieke. Uiteindelik het die laerskool sowel as die hoërskool ophou bestaan, juis omdat dieselfde Afrikaners se ekonomiese lot sodanig verbeter het, dat hulle na aangenamer woonbuurte in voorstede verder weg van die fabriekenywerheidsgebiede kon gaan woon. Binne die Nassau-skole se voedingsgebied was [[Pinelands]] egter die uitsondering, omdat dié tuindorp hoofsaaklik bewoon is deur beroepslui en nié ambagslui nie. [[Pinelands]] se Afrikaanse gemeenskap het later hulle eie [[Laerskool Oude Molen]] gekry, wie se minder as 70 leerders met ingang 1985 by [[Laerskool Groote Schuur]] ingeskakel het.
