Brackenfell: Verskil tussen weergawes

Uit argiefdokumente blyk dit dat die huidige Brackenfell reeds vroeg in die agtiende eeu beskryf word as geleë oor de Kuyls Rivier by de Duyvenheuvel. Die naam Duyvenheuvel kom nog in dokumentasie voor tot aan die einde van die [[VOC]] tydperk in 1795. Later word die heuwel Kanonberg genoem en nog later Kanonkop. Eens was dit die poort na die vreemde, die onbekende, die ongetemde binneland, later poort na die Bolandse dorpe, grens tussen stad en platteland. Ru afge-ets teen die groen wingerde van die Bottelaryberge was dit sedert die vroegste tye ‘n uitstaande baken in die omgewing. Reisigers het die koppie in die oog gehou om hulle koers te bepaal want van ver af kon jy hom al sien. Dit was dan ook sedert die vroegste tye ‘n gewilde uitspanplek waar paaie gekruis het van noord na suid en van wes na oos, ‘n bymekaarkomplek aan die voet van die heuwel veral aangesien hier verskeie fonteine was. Die boere van die Koeberg het in tye van droogte regs van die koppie verbygetrek met hul vee na die weivelde van die Hottentots-Holland. Grond is destyds spesiaal deur die regering uitgehou as ‘n trekgang vir die vee. Die pad van Durbanville af het by die drif van Stellenberg deurgekom en links by die kop verby verder na Bottelary en Stellenbosch gelei. Die pad van Kaapstad na Klapmuts, Paarl en Wellington het ook links teen die voet van die kop verbygegaan. Vandag ken ons hierdie pad as die R101, die Ou Paarlpad vroeër ook genoem die Kaapse Hardepad.