Springbokvlakte
Die Springbokvlakte lê in die Limpopoprovinsie met die Pienaarsrivier as suidgrens, waar dit die N1-hoofpad van Pretoria na Polokwane kruis. Weswaarts sluit dit die dorpe Warmbad (Bela-Bela), Nylstroom (Modimolle), Naboomspruit (Mookgophong) en Potgietersrus (Mokopane) in. Na die ooste is die dorpies Roedtan, Crecy, Marolong, Nutfield, Tuinplaas en Settlers deel daarvan. Dit is ‘n 80km breë en 130km lang strook grond wat in ‘n noordoostelike rigting loop met Roedtan as die sentrale dorp.
Ná die Tweede Vryheidsoorlog is die gebied oopgestel vir boerdery. Graslande het plek gemaak vir landerye of het bedek geraak met doringbome. Daar word geboer met koring, mielies, katoen, sorghum, grondbone en sonneblomme en lemoenbome is onder besproeiing aangeplant. 'n Groot verskeidenheid wildsbokke het die streek tot aan die einde van die 19de eeu gekenmerk. Verskeie wildplase op die Springbokvlakte poog tans om weer die verskeidenheid in natuurlewe te herstel.
Die vlakte is besonder plat, ongeveer 1000 m bo seespieël, ervaar warm somers (beskerm deur die Hoëveld teen koue winde) en droë winters. ‘n Gemiddelde jaarlikse reënval van 622 mm is normaal. Die swart turfgrond is besonder vrugbaar.
In die bodem is steenkool- en uraanreserwes.
Sien ook
wysigBibliografie
wysig- Standard Encyclopaedia of Southern Africa, deel 10. Kaapstad: Nasou, 1974. ISBN 0-625-00326-8
- www.miningweekly.com 21 Maart 2008, 6 April 2010