Stadhuis van Bloemfontein

Die Stadhuis van Bloemfontein (ook Bloemfontein-stadsaal, Engels: Bloemfontein City Hall) is 'n gebou in Bloemfontein wat die munisipale rade van Bloemfontein gehuisves het. Die gebou is in 1935 voltooi en in 2017 deur vandale afgebrand. Die gebou lê aan die President Brandstraat in die Bloemfonteinse middestad naas die Appèlhof van Suid-Afrika en teenoor die Hertzogplein.

Stadhuis van Bloemfontein
Die ingang van die Stadhuis van Bloemfontein aan die President Brandstraat
Inligting
Naam	Stadhuis van Bloemfontein
Dorp/Stad	Bloemfontein
Land	Suid-Afrika
Argitek	Gordon Leith
Kliënt	Bloemfontein-munisipaliteit
Voltooidatum	1935
Datum gesloop	2017 (afgebrand)
Strukturele stelsel	Sandsteen

Gebou

Die gebou is uit sandsteen gebou en is ontwerp deur Gordon Leith. Die stadhuis het 'n groot saal, die stadsaal, agter sy oostelike ingang. Daardie ingang aan die President Brandstraat het 'n simmetriese ontwerp met twee torings. Suile gee die oostelike ingang sy neoklassisistiese elemente. Skuinsbo die ingang, wat die simmetriese ontwerp verdeel, hang bordjies met die aanduiding Stadhuis en City Hall. Bo hierdie aanduidings is ook die destydse wapen van Bloemfontein weergegee.

Gedurende die 1980s is skuins agter die gebou nuwe munisipale kantore opgerig. Ook na die munisipale veranderinge in 2000 en die herindeling in 2011 gebruik die plaaslike owerhede steeds die stadhuis.

Verwoesting

Op 21 Junie 2017 het vandale die gebou aan die brand gesteek. Die brand is aangesteek tydens 'n protes van die Suid-Afrikaanse Munisipale Werkersunie wat die gebou vroeër die dag beset het. In die brand het ook die munisipale argiewe wat in die gebou was, verlore gegaan.

Tydens die brand is die dak en meeste in die gebou verwoes. Die mure het die brand egter oorleef, sodat daar hoop is vir restourasie van die gebou.

Eksterne skakels

• Wikimedia Commons het meer media in die kategorie Stadhuis van Bloemfontein.