Stroop

Hierdie artikel handel oor die vloeistof. Vir die rolprent, sien Stroop (rolprent).

Stroop (uit die Arabies šarab Engels syrup en via Latyn siropus) is 'n dik, viskeuse, gekonsentreerde vloeistof waarin groot hoeveelhede suiker (by name sukrose) opgelos is. Verlengde periodes van lugdigte bewaring word deur die hoë suikergehalte moontlik gemaak.

Stroop
Suikerstroop
Hoofbestanddeel	Sukrose
Geëet met	Brood, pannekoek, vetkoek ens.

Pannekoek met stroop

Dunner strope word siroop genoem; voorbeelde hiervan is limonadesiroop en esdoringstroop. Dun stroop bestaan vir meer as 'n derde uit suikers, en dik stroop tot 'n driekwart uit suikers. In laasgenoemde bevat die stroop ongeveer 1 250 kJ (= 300 kcal.) per 100 gram produk. Stroop of siroop word as basis gebruik vir geneesmiddels of as voedingsbron.

Etimologie

Die Afrikaanse term, wat vir die eerste keer in die Patriotwoordeboek van 1902 opgeteken is, is ontleen aan die Nederlandse stroop en Middelnederlandse siroop wat op sy beurt in die 13de eeu oorgeneem is uit Frans (sirop). In Duits kom Sirup vanaf die 12de eeu voor, in Engels vanaf 1398 as syrup.

Eksterne skakels

• Wikimedia Commons het meer media in die kategorie strope.