Suid-Afrikaanse Musiekkollege
Die Suid-Afrikaanse Musiekkollege is 'n departement van die Fakulteit Geesteswetenskappe aan die Universiteit van Kaapstad. Dit is geleë op die universiteit se laer-kampus in Rondebosch, Kaapstad.
Studiegeleenthede
wysigDie Suid-Afrikaanse Musiekkollege bied opleiding in onder andere orkesinstrumente, klavier, sang, Afrika-musiek en jazz aan. Die Kollege beskik oor verskeie stryk-, blaasinstrument-, jazz- en perkussie ensembles sowel as kore en 'n simfonieorkes. Die Operaskool bied ook jaarliks 'n seisoen van operaoptredes aan. Daar word van alle studente verwag om in die orkeste te speel óf in die kore te sing, na goeddunke van die Direkteur.
Studente wat diploma- of graadkursusse voltooi is gereed om die beroep van musiek te betree, hetsy as onderwysers, sangers of instrumentaliste in klassieke musiek, Jazzstudies of dans. Potensiële loopbane vir gegradueerdes sluit loopbane as deel van orkeste asook opera en oratoriosang, programsamestelling vir uitsaai netwerke, bibliotekarisse of -esse, uitvoerings en onderwys, in.
Die wye verskeidenheid nagraadse programme wat aangebied word, sluit in: etno-musikologie; uitvoeringstudies in klassieke musiek, Afrika-musiek en jazz; musiekwetenskap (teorie en geskiedenis); en komposisie.
Geskiedenis
wysigDie Suid-Afrikaanse Musiekkollege is gestig deur 'n groep musikante onder leiding van Madame Apolline Niay-Darroll en het in 1910 in Strandstraat, Kaapstad met ses studente 'n aanvang geneem met bedrywighede. In 1912 is Mnr. William Henry Bell as prinsipaal aangestel, en in 1914 verhuis die SACM na 'n groter perseel in Stal Plein.
In 1920 word Mnr. Bell as professor in musiek aan die Universiteit van Kaapstad aangestel, waar hy klasse vir graadkursusse aanbied. In 1923 is die kollege in die Universiteit opgeneem en word professor Bell dekaan van die Fakulteit Musiek. In 1999 word die Fakulteit Musiek opgeneem in die Fakulteit Geesteswetenskappe.
Strubenholm, voorheen die privaat woning in Rosebank van Henry Struben, is sedert 1925 die tuiste van die kollege. Dit huisves nou administratiewe kantore en lesingsale, sowel as 'n uitstallingsaal vir die wêreldbekende Kirby-versameling van Afrikaanse, Europese en Asiatiese instrumente.
Aan die einde van 1972 is twee nuwe geboue, wat aan Strubenholm gekoppel is, voltooi. Dit bevat die 160-sitplek Chisholm uitvoeringskamer; 'n opera ateljee, die Fiasconaro-kamer; byna 100 onderrig ateljees en oefenkamers; en die W.H. Bell Musiekbiblioteek, wat 'n verskeidenheid naslaan- en teksboeke, tydskrifte, partiture en plate bevat. Daarbenewens is daar ook opname- en elektroniese musiek ateljees en 'n luisterlaboratorium.
Die konsertsaal met 638 sitplekke in die aangrensende Baxter-teatersentrum-kompleks, met sy uitstekende Von Beckerath orrel, is 'n belangrike uitvoerings- en onderriglokaal vir die kollege.
Noemenswaardige alumni
wysig- Darryl Andrews
- Cromwell Everson
- Robert Fokkens
- Malcolm Forsyth
- Stefans Grové
- Hendrik Hofmeyr
- John Joubert
- Eddie Kramer
- Galt MacDermot
- Ike Moriz
- Dizu Plaatjies
- Priaulx Rainier
- Melanie Scholtz
- Judith Sephuma
- John Tyrrell
- Peter van der Merwe
- George Walker
- Martin Watt
- Marcus Wyatt
- Pretty Yende